Salgnina ong·atenggipa GHADC-ni budget session-ko a·bachengata

TURA: Salgnina ong·atenggipa Garo Hills Autonomous District Council (GHADC)-ni budget session-ko Mongolbar salo a·bachengataha aro ia session-ni gnigipa salo chanchirimna gita MDC-rang, dingtang dingtang motion-rangko ra·gatangaha.
Skanggipa salo, budget session-ko GHADC-ni Chairman Sengchim N Sangma dilangaha aro ia session-o pilak MDC-rangan bakko ra·angaha.
Ia session-ko ong·atanio GHADC-na dingtang electoral roll-ko tariani bidingo chanchirimna gita Williamnagar-ni MDC Alphonsush R Marak, motion-ko ra·baahachim indiba ia motion-ko NPP-chi dilenggipa Executive Committee ra·chakgija jegalataha.
Tura jillara Sixth Schedule-ni ning·o ga·akgipa biapsa ong·ani gimin Municipal Board-ko ra·galani bidingo chanchirimna gita Tura-ni MDC Bernard N Marak, motion-ko ra·baskaahachim indiba ia motion-koba bang·bata MDC-rangan jegaltokaha.
Indake ong·engon, Garo Customary Law (GCL)-ko taridapani bidingo chanchirimna gita Deputy CEM Nikman Ch Marak-ni motion ra·bagipako aro 15th Finance Commission-ni ning·o Assam Schedule-ko bon·ate Local Body-rangko songani bidingo chanchirimna gita Tura-ni MDC Bernard Marak-ni ra·bagipa motion-kode GHADC-ni MDC-rang ra·chakangskaaha. Ia minggni motion-ni gimin da·al Budbar salni bako MDC-rang chanchirimanggen.
Iana skang, budget session-ni question hour-o Opposition MDC-rang, Members Hostel-ko rikani matchotkujaengani gimin, 5th Pay Commission-kon ra·gatani gimin, Garo Hills-o niam gri bol ratani karkanarangko chalaiengani gimin, GHADC-o gital kam ka·giparangko rakkidapani gimin, niam gri ro·ong quarry-rangko chalaiengani gimin aro uandakgipa dingtang dingtang kamrangni bidingo NPP-chi dilenggipa Executive Committee-o sing·doangtokaha.
GHADC-o man·sogipa kajinarangni gimin Forest-ni Executive Membor Ashahel D Shira, council-na talataniko on·angskaengon, 2017-18 bilsioni 2021-22 bilsiona minor mineral-rangoniko gimik gong 8,64,23,344-ko man·soaha aro ianonin gong 8,18,53,998-kode PCCF aro HOFF-ni office-oniko kajina dake man·soaha aro gong 45,69,346-kode minor mineral-rango nangchakegipa kamrangko ka·enggipa contractor-rangoniko Forest kajina dake gile man·aha ine parakataha.

Get real time updates directly on your device, subscribe now.

Comments are closed.