SHILLONG: East Khasi Hills a·jani Sohiong C&RD Block-o gital rikgipa Rural Market Complex-ko Bristibar salo a·dokni Chief Minister Conrad K Sangma, kulie on·angaha aro ia Rural Market-ko kulie on·anganio a·dokni C&RD Minister Hamletson Dohling, Sohiong-ni MLA Samlin Malngiang, Sohra-ni MLA Gavin Mylliem aro jolo songdongenggipa manderangba dongpae bak ra·angtokaha.
Ia Sohiong Rural Market Complex-ko rikna gita NEC aro BASIN, gong kror 12.9 tangkarangko dakchake on·ahachim aro ia Rural market complex-o Cold Storage aro garirang donchakani biaprang baksana dam 112 stall-rangko donaha.
Sohiong-o gital rikgipa Rural Market Complex-ko kulie on·angani somoio a·dokni Chief Minister, jinmana aganprakengon, game ge·e cha·enggiparangni neng·nikanirangko chel·chakna gita sorkari, dingtang dingtang program-rangko ra·gate dakchakanirangko on·na jotton ka·enga aro ia Rural Market-ko kulianichi jolo game ge·e cha·enggipa manderang bang·a namgnirangko man·gnok ine parakangaha.
Ia Rural Market Complex-ko game ge·e cha·enggiparangni namgnina aro mongsongbate jolo songdongenggipa manderangni namgnina jakkalangchina gitaba ua songni nokni dilgiparangko aro jolo songdongenggipa manderangko didiangaha.
Sohiong Block-ko namdapatna gita sorkari gong kror 3 tangkarangko chame donmanaha ineba ia tom·anio Chief Minister parakataha.
Sohiong jolrango namroro silroroaniko ra·bana gita sorkari kang·kare kae kamko ka·enga ine janapatengon, kal·susaanirango gisik nanggipa manderangna stadium-ko rike on·an baksana, manderangni jabolrangko chimongna gita CMSDF-ni ning·o gari bolsako Sohiong-na on·gen ineba Chief Minister parakataha.
Game ge·e aro bading chiwale cha·enggipa manderangni nangrime bikotgipa producer group-rangnaba ia tom·anio gimik gong lak 47.75-ni cheque-rangko Chief Minister, suale on·angaha.
