SHILLONG: COVID-19 sajinmani a·sel rikanio ja·manchakatako man·gipa Shillong songjinmani Umpling dolongko Bristibar salo, a·dokni Deputy Chief Minister aro PWD Minister Prestone Tynsong-ni jakchi do·ga oe on·angaha.
Ia dolongko do·ga oe on·ahani gimin Bristibar sal dipet ia dolong gita gari gorarangkoba re·rurana on·angaha.
Ia dolongko bilsi gittam skangan rikna a·bachengahachim aro ua somoio ia dolongko ja 18-ni gisepon matchotatna gita somoiko on·ahachim.
Ia Umpling dolongko do·ga oe on·angani somoio a·dokni Deputy Chief Minister, jinmana aganprakatengon, ia dolongko rikanio ja·manchakatako man·ahaoba korosrang a·bachengo tik ka·gimin gitan ong·aiahani gimin ia dolongko rikanio gong kror 5-san ong·aiaha ine parakataha.
2020 bilsionin Meghalaya a·dokoba Covid-19 sajinma batrikrikahani a·sel ia dolongko rikanio ja·manchakatako man·aha ineba Tynsong parakataha.
New Shillong Township-ona dakanggipa ramarango garirangni apchangket ong·aniko namatna gita ia dolongko rikaniara namen nangchongmotgipa ong·achim ineba Deputy CM aganaha.
