TURA: Sajinmani somoirangoba Anganwadi worker-rang, an·tangtangko on·kange manderangni namgnina kamrangko ka·engoba Anganwadi-rangna komibeesa dormaharangko on·engani a·sel Anganwadi worker-rang neng·bee janggi tangna gita nangtokenga ine All Garo Hills Anganwadi Workers & Helpers Association (AGHAWHA) parakatenba, Anganwadi-rangna jao komibeoba gong 10,000-ko dormaha dake on·china a·dok sorkario dabiangaha.
“Ia sal somoirango Anganwadi worker-rang rakbegipa kamrangko ka·na nangengoba uamangna dormaharangko komibee on·aniara namen dukni katta ong·a. Da·ororo pilak bostuni damrangan namen rakbeaha aro Anganwadi worker-rangde bang·pagija dormaharangkosa man·engani gimin an·tangtangni nokdangko chalaianio namen neng·nikanirangko chagrongna nangtokengaha. Iandakgipa neng·nikanirangko chagrongna nangtokengoba uamang kamtangtangko name chu·sokatenga, uni gimin Anganwadi worker-rangni dormahako komibeoba gong 10,000/-ona bariatchina sorkario dabienga,” ine AGHAWHA-ni secretary MD Shira parakataha.
Anganwadi worker-rangna TA/DA-rangko somoi gita on·chinaba association-ni secretary, a·dok sorkariko didiangaha.
Am·bolni damko 45 paisa-oniko komibeoba gong 1-ona bariatchina dabiangskaengon, am·bolni damrangko jagittamprakon gamani ong·genchimoba tangkarangko gama tik ong·jaengani a·sel Anganwadirang kamtangtangko ka·anio neng·nikanirangko man·na nangenga, maina bi·sarangna cha·anirangko song·e on·na gitade Anganwadirangna am·bolrangkoba nangchongmota ine Shira parakataha.
Skia pora donggipa aro kamni gimin u·i-ma·sigipa Anganwadi worker-rangko kam ra·dochina gitaba, AGHAWHA-ni secretary, sorkariko didiangaha.
Anganwadi worker-rangko sorkarini dingtang dingtang health program-rang, jekai Polio tika su·ani, TB-na survey ka·ani aro uandakgipa kamrangna jakkalengon, Polio tika su·ani kamko ka·anio ASHA worker-rangnade sakprako gong 100/-ko on·e, Anganwadi worker-rangde gong 75/- ka·e on·skaengani gimin AGHAWHA-ni secretary raken jegalataha aro Polio program ge·antion Anganwadirangnaba gong 100/- ka·e on·china sorkario dabiangaha.
Kenbegnigipa COVID-19 sajinmako warachakanio Anganwadi worker-rangna maming man·gnirangko on·jaengani gimin Shira, sorkarini kamko raken jegalataha aro iani bidingo nipiltaienba, nanga gita man·gnirangko Anganwadi worker-rangna on·china didiataha.
Comments are closed.