TURA: New Tura-o gital kulina sienggipa amphitheatre-ko da·o matchotna skangan, rona re·angenggipa manderang, churing chupeke nosto ka·na a·bachengengaha ine kobor on·aha.
Ia amphitheatre-ko mikkang jaon matchotate Tura-ni manderangna pakwate on·na siengahachim indiba ia biapona re·ange nion, ia biapo churing chupeke rogipa manderangni bottle gopee donanirangko nikna man·aha aro ian manderangna kenchakna nangani ong·enga ine kobor on·timgiparang parakataha.
Jolo songdongenggipa manderangni u·iatani gitade, mitam manderang, ia biapona re·ange me·chikrang baksaba kragija dake roengachim.
Ia amphitheatre-ko rikna gita 2017 bilsio Arts & Culture department-ni ning·o sanction ka·ahachim aro iako Meghalaya Government Construction Corporation jako ra·e rikengachim.
Ia amphitheatre-ko rikani kamrang da·o matchotahaoba pakmarangko kapengani kamrang matchotkujaengachim.
Iani bidingo West Garo Hills a·jani Deputy Commissioner Ram Singh-o sing·sandiaton, ua police-rangko nirok sandina gita ge·etaniko on·atmanaha ine parakataha.
“Ia amphitheater-ko mikkango jaode matchotenba MGCC pakwate on·angna siengaha. Ia biaprango churing chupeke rogiparangko nirok sandichina gita anga police-rangna u·iataha aro da·o police-rang ia biapko nirikkianggnok,” ine Singh parakataha.
Ia amphitheatre-ko matchotahaode ia biapo dingtang dingtang program-rangko ong·atchakna man·gnokchim.