MMDC, dist admin niam grigipa quarry, koela a·damrangona re·ange niea  

Tura: West Garo Hills District-ni gisepo niam gri quarry bikotani aro koela choani kamrangko sandina krenge Meghalaya Minerals Development Corporation (MMDC) aro district administration, niam gri daka kamrangko champengna a·kaweni jolni bang·a biaprangona u·iatgija jagokmanpile re·ange nieaha.
MMDC-ni co-chairmanba ong·enggipa GHADC-ni CEM gitcham Dipul Marak-ba deputy commissioner, Ram Singh, West Garo Hills-ni SP Vivekanand Singh aro state forest department-ni range officer baksa u·iata gri chagrope sandiao dongpaaha.
Jean ua jolni samtangtang jol gimikna namen kengniko ong·atenggipa ua niam gri daka kamrangko rim·na dolgni dolrang, dolsa Pipulbari-ona aro dolgipin Hollaidanga-ona uandake a·kawejolni gipin biaprangona re·angaha.
“Ua joloni bang·arangan uandake a·jolni NGO-rangni matnanganirangko man·e mija Sukrobar salo re·angaha. Chingni wenangmitingo chinga niam gri koela choenggipa Balal Adugre songonaba re·angaha. Unon chinga sak bonga manderangko koela chogipa biapo nikeaha. Uamangni aganani gita ua koela a·dam songni nokmani aro sakgipin Bolsalgre Selsella-ni Repnon Marak-ni ong·a,” Dipul aganaha.
Apsan songni gisepon bang·en niam grigipa ro·ong quarryrangkoba chinga nikaha jeon ua niam gri ro·ong quarry-rangko chalaiani kam gimikan Assam-ni manderang Nokmarang aro maharini manderang baksa sriksrik ong·gija kamko ka·enga. Ro·ong quarry-rangko bikotaan baksana apsan songon komibeoba ge·gni niam grigipa ro·ong jetranggipa donga, CEM gitcham agandapaha.
CEM gitchamni gita nambate sing·sandiani ja·kuko de·na uni wenangani report-ko ua a·dok sorkarina on·gen.
“Jensalo chinga ua songona re·baaha, bang·a ro·ong gatgipa trak garirang donuaha. Chingni ontisa re·angani ru·utgijaan biaponi ta·raken sale kataha. Uamangni mikkango saoba dongode saljeta man·pilgenchim. Ua niam grigipa quarry nokgiparangna mikrakataniko on·enga maina uamang jeko dakenga uan niamni kosako dakbadeani ong·enga indiba uamang indaken dakangkuenga,” MMDC co-chairman aganaha.
Deputy Commissioner, Ram Singh, jean district SP aro Range officer baksa a·jolgipinona re·angaha, uamang a·jolni nokmrang baksa uamangko skina aro uandake niam gri daka kamrangni a·sel neng·nikani ong·ani gimin uamangna skie on·a jotton ka·e chanchidilangaha ine Singh u·iataha.
“District-ni gisepo niam gri ro·ong quarry ba koela bikotgipa-chogiparangko champengna ian chingni jotton ka·ani ong·a. Assam sima-ariogipa bang·a biaprangko chinga maming u·iatako dakgija chagrope sandieaha maina dal·dala niam grigipa ro·ong quarryrang aro ro·ong jetgiparang donga,” Ram Singh aganaha.
A·jolni Nokmarangko ua niam gri kamrangko ka·anina sing·e  aro uamamgni a·jani gisepo indakgipa niam gri kamrangna uamang report-ko on·jaode mikkangchi niam gita kachario mikkang pana nangnaba donga ine uamangko mikrakataha, DC u·iataha.
“Assam-oni manderangko niam gri quarry bikotna aro ro·ong jetani kolrangko songna on·ode police-na badi ka·ana gre chinga chol dongja. Uamang manijaode chinga uamangni kosako mamla segatgen,” DC aganaha.
Assam sima-ari sepango bang·bata niam gri quarry bikotgiparang baksa Meghalaya-chipak inditana mande jeljani a·selo bikotangkuna jotton ka·enga indake namen neng·nikani ong·enga, Ram Singh aganaha.