EKH-o mande saksako Yaba tablet-rang baksa rim·a

SHILLONG: East Khasi Hills a·jani sima joloniko BSF dolni sipairang, mande saksako rong 3000 Yaba tablet-rang baksa rim·na man·aha ine kobor on·aha.
Ia Yaba samrangko East Khasi Hills a·jao donggipa Umsyiem songni bilsi 42 ong·gipa Prakash Sumer, Bangladesh-ni mande saksana on·atna gita ML-05S 8414 gario, sima jolchipakna re·baengachim aro iani bidingo BSF dolni sipairang kobor man·soenba, ia mandeko rim·sona man·aha.
Ia mandeko BSF dolni sipairang, East Khasi Hills a·jao donggipa Rimasar song sambao rim·soaha aro uni gario dongnue ra·baenggipa Yaba tablet-rangkoba man·aha.
Ia mandeko rim·ani ja·man Shillong-oni Anti Narcotics Task Force (ANTF)-ni official-rangba ua biapona sokange, iani bidingo am·sandianirangko dakna a·bachengataha.
Ia mandeko aro uoniko man·gipa samrangko ja·mano, Pynursla Police Station-ni jako pakwate on·ataha aro ia mandeni kosako FIR ka·doangaha.