SHILLONG: Assam aro Meghalaya a·dokni simarango ong·enggipa golmalrangko namatna kam ka·anio a·dokni mitam songrangko Assam-o napatengani gimin ia songrango donggipa manderang sorkarini kosako jegalanirangko daktokengon, All India Trinamool Congress (AITC)-ni dilgiparang, ia songrangona re·ange manderangni gisepo ding·chaoataniko ra·bana jotton ka·skaenga ine Congress Legislature Party (CLP)-ni gitcham dilgipa Ampareen Lyngdoh matnangataha.
A·dok damgnini simarango ong·enggipa golmalrangko namatna gita a·dok damgnini gisepo songgigrikaniko dakani a·sel ia jolrango songdongenggipa manderangni gisepo indinan ding·chaoani aro suk ong·gijanirangko nikna man·engahani gimin political dolrang, ia biaprangona re·ange manderangni gisepo ding·chaoatanirangko dakna nangja ineba Lyngdoh aganaha.
AITC-ni dilgipa Mukul Sangma aro gipin dilgiparang, adita salrangna skangsan sima ari jolrango donggipa songrangona re·ange, ia songrango donggipa manderangni Assam-o ong·na siktokjaengani gimin talatanirangko dakna jotton ka·ahachim.
“Meghalaya a·doko election ong·na sepangjokode pangnan dilgiparang, an·tangtangko a·songtangna dakgrikgiparang gita mesokna jotton ka·ronga aro ian namen kragijani ong·a. Skanggipa bako Assam a·dok baksa songgigrikaniko pilak political dolrangan ra·chakna nanga ine anga an·tangde chanchia,” ine Lyngdoh aganaha.
Assam a·dok baksa agangrikna nangani gnigipa bak dongkuengani gimin iandake election-na mikpakma nie ding·chaoatanirangko dakani pal pilak dolrangan, iani bidingo ma·mong sorkari baksasa agangrikna nangenga ineba ua aganaha.
“Da·o ia kamko Delhi-ona ra·angmanahani gimin ian CM-ni jako ong·jaha ine uni agananiara kakketan ong·a. MoU-o soi ka·grikna skangan ia dolrang, jinma chanchirimanirango dongpae bak ra·na nangachim ong·jaode ma·mong sorkariona re·ange agangrikna nangachim maina da·o a·dok damgnini chief minister-rang, songgigrikaniko ra·pilna man·jawaha,” ine Lyngdoh parakataha.
Ia sima arini bidingo opposition dolrang gisik nangbebegenchimode, da·o gita songrangona re·ange ding·chaoatanirangko ra·bana jotton ka·ani pal, regional committee-rangni ia songrangona re·angani somoion dongpana nangachim ineba ua aganaha.
A·dok damgnini simarango meligrikna man·jaenggipa dam 12 biaprangoni damdok simarangni bidingo badiaba dolrang suk ong·nikjaenga ong·ode ma·mong sorkari baksa agangrikena man·on nambatgen ine Lyngdoh parakataha.