WGH-o police-rang baksa gogrike bobil dolni mande saksa so·otako man·a

TURA: West Garo Hills a·jao police-rang baksa gogrike, ma·sina man·gijagipa bobil dolni mande saksa so·otako man·aha ine kobor on·aha.
Police-rangni kobor on·ani gitade, Sombar pringwalo, mande rim·gittanggipa dolsa manderang, Dadenggre police station-ni ning·o donggipa biap damsao police-rangko gochengaha aro ja·mano ia manderangko police-rang gochakon, ia manderangoni saksa so·otako man·aha.
West Garo Hills a·jani Chibinang aro Phulbari jolrango bading chiwalgipa manderang gue brena re·rurarongani gimin dolsa manderang, gue badinggipa manderangko rim·gittangna miksongenga ine police-rang, Robibar walni 7:30 bajimango koborko man·soenba, ia biaprango re·ruragipa manderangko nirok sandina a·bachengatahachim.
“Koborko man·soani ja·man, chinga Tura-oni Selsella gita Phulbari-ona aro Dadenggre-Rongram gita Tura-ona mobile patrolling team baksa sandirokna re·angaha. Sombar pringwalni 1:15 bajimango chingni Chibinang-oni Dadenggre-chipakna re·baengmitingo, silchidare ra·bitgipa dolsa manderang, chingko gital RCC dolong rikgipa sambao Magalpara songo chadrapsoaha. Ia bobil dakgipa manderangni silchidarerangchi chingko gosoanichi police-rangni Maruti Gypsy bolsa, headlight rongsa nosto ong·atako man·aha aro jakasini tyre rongsa bretatako man·aha. Chingni sipairangko gosoon chingni sipairangba uamangko gochakskaaha aro uandaken dolgnini gisepo minute 5-mangna gogrikaha,” ine West Garo Hills a·jani Superintendent of Police (SP) Vivekananda Singh parakataha.
SP-ni u·iatani gitade, ia a·sel ong·ani somoio ua an·tangan ua biapo dongpae adita saknaanirangko man·na nangaha.
“Dolgnini gisepo gogrikani komiangahaon, chinga ia a·selni bidingo district magistrate aro gipin chubata gadangni official-rangna u·iataha,” ineba Singh parakataha.
Magistrate-ni ua biapona sokangani ja·man, ua biaprangoniko am·sandion, guli nanga man·gipa me·asa saksani manggisiko ua biaponiko nikaha ineba SP parakataha.
Indake ong·engon, ua biaponiko police-rang, AK rifle pongsa aro magazine ge·sa, 7.62 guli rong 34, 7.62-ni gogimin guli rong 45, 9mm-ni gogimin guli rong 22, electric detonator ge 3, gelatine stick ge  4, safety fuse metre 2 aro gipin bosturangko man·aha ineba SP parakataha.
Sigimin manggisiko ja·mano post mortem ka·na gita Tura Civil Hospital-ona ra·baaha.