SHILLONG: Assam aro Meghalaya a·dokni simarango ong·enggipa golmalrangko namatna ja·ku de·anio, Meghalaya a·dokni mitam songrangkoba Assam-o napatna tik ka·ahani gimin Assam aro Meghalaya sorkarirangni soi ka·grikgipa Memorandum of Understanding (MoU)-ko jegale, re·anggipa Budbar salo, West Khasi Hills a·jani Mallangkona aro samba jolrango donggipa dingtang dingtang songrangoni hajalni hajal manderang, tom·tome re·jomaniko ong·atangaha.
Ia re·jomaniko Tarabari sector aro Gizang sector-ni Mallangkona Area Development Organisation & Joint Action Committee ong·atangaha aro re·jomaniko Simanaguri bakraoni a·bachengatenba Sildubi song gita re·jomange apsan biapon matchotateaha.
Ia re·jomaniko ong·atanio bakko ra·gipa manderang, ia songrangko Meghalaya a·dokon donchina aro a·dok damgnini gisepo soi ka·grikgipa MoU-ko den·galpilchina dabie chrik a·bokanirangko daktokaha.
Iana skang, FKJGP Langpih unit aro AHAM Aradonga unit-ko man·chape dingtang dingtang dolrangba iani bidingo tom·aniko ong·atangaha aro a·dok damgnini soi ka·grikgipa MoU-ko ra·galpilchina dabianio Mallangkona jolrango songdongenggipa manderangna bakrimpaaniko on·angaha.
Adita salrangna skangsan, Garo Hills-oni GSU-CEC, ADE, AYWO, Tura Garo Senior Citizens Forum (TGSCF) aro gipin dolrangba West Khasi Hills a·jaona re·ange, Khasi Hills-ni GSU Khasi Hills Zone, KSU Riangdo circle, Nonglang Sirdarship-ni membor-rang aro gipin dolrang baksa Simanaguri songo songni manderang baksa jinma tom·bimonganiko ong·atangenba, manderangni nangnikanirangko ra·chenggija Meghalaya a·dokni mitam songrangko Assam-o napatna tik ka·ahani gimin dolgni sorkarirangni kosako raken jegalanirangko dakangtokahachim.
Ia tom·bimonganio Garo Hills-oni re·anggipa dingtang dingtang dolni dilgiparang, jinmana aganprakengon, iani bidingo uamang Meghalaya a·dokni Chief Minister Conrad Sangma-ko grongenba, ia MoU-ko den·galpilchina didigen ine ku·rachakaniko on·angaha.
Uamangni mol·molaniko Meghalaya sorkari aro chief minister knachakjagenchimode, Garo Hills-osan ong·aigija Khasi Hills a·jaoba dingtang dingtang dake jingjengatanirangko dakanggen ineba dingtang dingtang dilgiparang parakangaha.