SHILLONG: Ia bilsini Assembly election-ni ja·man Manipur a·doko Bharatiya Janata Party (BJP)-chi dilenggipa sorkario National People’s Party (NPP)-ko rimnapna jechakani ja·man, re·baenggipa 2023 bilsini Assembly election-ni ja·mande Meghalaya a·dokoba BJP dol, NPP baksa bakrimjana gita manchie donmanaha.
Koborko man·soani gitade, re·baenggipa 2023 bilsini Assembly election-ni ja·man BJP dol, da·o MDA sorkario bak ong·enggipa gipin dolrang baksa bakrimgenchimoba NPP dolko watchanggalskanaba gnang.
“2018 bilsio, Conrad Sangma aro North East Democratic Alliance (NEDA)-ni convenor Himanta Biswa Sarma, Meghalaya Democratic Alliance (MDA) sorkariko rikna gita kamrangko ka·aha indiba da·o NPP dolsa, salgro salaram jol gimikkon ra·gopna jotton ka·engani gimin ma·mongo BJP-ni dilgiparangba suk ong·nikjaengaha,” ine BJP-ni dilgipa saksa parakataha.
Ma·mong aro salgro salaram jol gimikon BJP-ni dilgiparang nangniktokjahani giminsa NPP-ko Manipur sorkario rimnapjaha ineba ua aganaha.
Meghalaya a·doko tangka jakkalsretani, niam gri koela bikotani, power department-o ong·gija dakani aro uandakgipa dingtang dingtang kamrangna NPP dolni kosako BJP pangnan matnangrongengachim aro iani giminan da·o mikkang bilside BJP dol, MDA-o bakrimenggipa gipin dolrang baksa bakrimkugenchimoba NPP baksade bakrimjanaba dongaha ine niksamsona man·engachim.
“Chingni MLA AL Hek-ko Cabinet-oniko ra·galani giminba a·doko aro ma·mongo BJP-ni dilgiparang bang·batan suk ong·tokjaha,” ineba BJP-ni dilgipa aganaha.
Koborko on·ani gitade, Chief Minister-ni South Tura constituency-o da·o Tura-ni MDC ong·enggipa Bernard Rimpu Marak-ko susaatenba, Conrad Sangma-na neng·nikaniko ra·bana BJP miksongenga aro ian election-na skang dolgnini gisepo nangrime ka·ani dongjawa ine mesokaniba ong·skaengaha.