Garo Hills-oba Jisu Kristoni chakatpilaniko kusi ong·e manianga

TURA: Jisu Kristoni sianiko amsrange gopramoni chakatpilaniko mijal Robibar salni bako Garo Hills-ni dingtang dingtang biaprangoba Kristian bebera·giparang, dingtang dingtang program-rangko ong·ate maniangtokaha.
Tura Baptist Mondolini ma·mong gilja noko ia Easter Sunday ba Jisu Kristoni chakatpilani salko maniangengon, pringwalni ‘Sunrise Service’-ko ong·atangaha aro ia olakkianio bang·bea bebera·giparang re·bae bakko ra·angtokaha. Iani ja·man pringni olakkiani aro attamni olakkianikoba apsan biapon ong·atangaha, jeon bang·bea manderang, Jisu Kritoni chakatpilanina Nokgipa Isolko demittele olakkiangtokaha.
Apsan daken, Tura-ni Catholic Mondoliba Jisu Kristoni chakatpilani salko manina gita dingtang dingtang program-rangko ong·atangaha. Tura-ni Sacred Heart Shrine ba gilja noko re·anggipa Sonibar walonin dingtangmancha ia salko nichaksona gita tom·bimonganiko ong·atangaha, jeon hajalni hajal Catholic bebera·giparang Isolko olakkina aro Jisu Kristoni chakatpilaniko nichaksona gita tom·bimongtokaha.
Uandaken, Robibar salni bakoba ia Sacred Heart gilja noko bang·bea manderang tom·chimonge Isolko olakkirimanio bakko ra·angtokaha aro Jisu Kristoni chakatpilaniko kusi ong·e maniangtokaha. Jisu Kristoni chakatpilanina manderang kusi ong·e manitokengon, Garo Hills-ni dingtang dingtang biaprango manderangni chisamrango picnic ba apsan ku·si ong·e cha·rimanirangkoba nikangna man·aha.
Gilja jokani ja·mano manderang an·tangtangni nokdangni manderang baksa, ripengskarang baksa aro gittimtang ba doltangni manderang baksa chisam ba uandake jinma rochakani biaprangona re·ange mi bijakrangko song·e cha·an baksana kusi ong·e roanirangkoba dakangtokaha.
Mitam manderang Robibar salo apsan cha·rim ringrimanirangko dakangtokahaon, mitam manderangde da·al Sombar salni bako picnic-rangko cha·skana gita manchisamsoanirangko dakangaha aro uandaken picnic-ko cha·na gita be·en bitin aro ma·manti bosturangko ra·e donsotokaha.