SHILLONG: Re·anggipa Sombar salo, drugs ba pekatgipa samrangko badingenggipa mande sakgniko Meghalaya Police-ni Anti Narcotics Task Force (ANTF)-ni sipairang, West Khasi Hills a·jani New Nongstoin-o uamangni para ra·e dongenggipa nokoniko rim·aha.
Rim·ako man·gipa manderangara, New Nongstoin-o donggipa Mawbyrshem gittimoni Pynskhem Lyngdoh aro Mairang-o donggipa Nongkhlaw-oni Bankyntiew Wanniang minggipa manderang ong·achim.
Sombar attamchibara, ANTF-ni sipairang, uamangni dongchakenggipa nokona re·ange uamangko rim·na man·aha aro uamangoniko gram 22 ong·gipa ‘Heroin’ samrangko man·aha.
Ia manderangan Nongstoin jolrango drugs-rangko badinganio mongsonggiparang ong·achimkon ine police-rang chanchichipenga.
Iani bidingo police-rang, NDPS Act-ni ning·o dongimin niamrango pangchake mokordomako ka·aha aro West Khasi Hills a·jao drugs badingenggipa gipin manderangkoba am·sandina a·bachengataha.
