NGH-ni dam 11 PHC aro dam 37 sub-centre-ko Health & Wellness Centre-ona ra·doata

RESUBELPARA: North Garo Hills a·jao nambate sanna bananirangko on·na man·na gita dam 11 primary health centre (PHC)-rang aro dam 37 sub-centre-rangko Health & Wellness Centre-ona ra·doataha ine Bristibar salo, Meghalaya Assembly-ni Deputy Speaker aro Resubelpara-ni MLA Timothy D Shira, jinmana parakataha.
Azadi Ka Amrit Mahotsav aro Meghalaya a·doko Ayushman Bharat – Health & Wellness Centre-ni bilsibri gapaniko maniani bak gita Block Health Mela-ko Resubelpara C&RD Block-ni ning·o donggipa Manikganj Secondary School-o ong·atanio Shira, iako parakataha.
Health department-ni gita on·enggipa dingtang dingtang scheme aro sanna banani cholrangni bidingo songni nokni manderangna u·iatna gita block health mela-ko April 18 tarikoni 22 tarikona dingtang dingtang block-rango ong·atengachim ine nikna man·a.
Ia Block Health Mela-ko ong·atanio Resubelpara-ni MLA, jinmana aganprakangengon, ia Health Mela-ko ong·atanichi bang·a songni manderangan namgnirangko man·tokenga ine ia program-ko ong·atenganina District Medical & Health Office (DM&HO)-ko mittelpilangaha.
Ia health mela-ko ong·atanichi songni nokni manderangna sanna bananirangko on·na man·enga ine janapatengon, iandakgipa health mela-rangko manderangna maming tangka paisa grisa ong·atengani gimin manderang pilakan iandakgipa mela-rango bak ra·e an·tangtangna namgnirangko ra·na nanga ine Shira didiataha.
Bilsi 12-oni bilsi 15 ong·giparangna COVID-19-ni tikarangko man·engkua ine janapatengon, tika su·e ra·kugijagipa pilak manderangkon an·tangtangni namgnina su·e ra·china gita Shira didiataha.
Ia tom·anio ua Megha Health Insurance Scheme (MHIS)-ni namgnirangni giminba manderangna talate on·angaha aro ia scheme-ni ning·o an·tangtangko biming segatchina gita Shira didiangaha.
Ia Block Health Mela-ko ong·atanio ma·giparangna aro bi·sarangna ra·gatgipa scheme-rang jekai, PMSMA, JSSK aro uandakgipa gipin scheme-rangni giminba manderangna talate on·angaha.
Ia salsana ong·atanggipa health mela-o manderangni dingtang dingtang saanirangna porikka ra·e nianirangko, sanna bananirangko aro COVID-19-ni tikarangkoba su·e on·angaha.
Ia mela-ko ong·atanio dongpae jinmana aganprakanggipa gipin manderangara, North Garo Hills a·jani Deputy Commissioner RP Marak, Dr RK Sangma, Dr Lincy Nokme Marak aro gipinrang ong·a.