TURA: Assam aro Meghalaya a·dokni simarango ong·enggipa golmalko namatna ja·ku de·anio Meghalaya a·dokni mitam songrangkoba Assam-o napatna a·dok damgnini soi ka·grikgipa Memorandum of Understanding (MoU)-ko jegale Sukrobar salo, Garo Hills-ni dingtang dingtang dolrang, chong·motan GSU, FKJGP, AYWO, ADE, FAF, NTDF aro GGU dolrang, jinma tom·bimonganiko Tura-o ong·atangaha aro ja·mano ia dolrang, a·dok damgnini soi ka·grikgipa MoU-ni bidingo Union Home Minister Amit Shah-na memorandum-ko on·ataha.
Ia tom·bimonganiko New Tura kal·chakramo ong·atangaha aro ia tom·bimonganio Garo Hills-onisan ong·aigija Khasi Hills a·jarangoniba dingtang dingtang dolrang aro songni manderang re·bae bakko ra·angtokaha.
Ia tom·bimongani ja·man jinma re·jomaniko ong·atna manchisoahachim indiba mikkarang jimbee waahani a·sel jinma re·jomaniko dakgija, dingtang dingtang dolni dilgiparang an·tangtangan Dakopgre-o donggipa Chief Minister-ni office-ona re·ange, memorandum-ko on·baaha.
Amit Shah-na sedoatgipa chittio a·dok damgnini soi ka·grikgipa MoU-ko jegalatengon, ia MoU-o Meghalaya a·dokni bang·a songrangkon Assam-o napatna gita dolgni sorkarirang songgigrikahani gimin ian ia jolrango songdongenggipa manderangna namen ra·chakna man·gijani ong·enga ine ia MoU-ko ra·chakjachina NGO-rang didiataha.
“Assam-o napatenggipa bang·bata songni manderang baksa agangrikchenggijasa Assam aro Meghalaya sorkarirang soi ka·grikahani gimin chinga ia songgigrikaniko raken jegalenga. Ia biaprangara Sixth Schedule a·jao ga·akgipa biaprangsa ong·ani gimin songni dilgiparang aro songni manderang baksa agangrikchenggijade sorkari, ia a·arangko kangna aro gipinna pakwatna gita bil dongjachim. Uni gimin ia MoU-ko den·galpile a·dok damgnini chief minister-rang baksa iani bidingo chanchirimpiltaichina chinga mol·molenga,” ine Union Home Minister-na seatgipa chittio NGO-rang parakataha.
Assam-M’laya a·dokni gisepo soi ka·grikgipa MoU-ko jegale jinma tom·bimonga
Date:
Share post:
