SHILLONG: Meghalayao re·baenggipa 2023 bilsio ong·nasienggipa Assembly election-rango, All India Trinamool Congress (AITC) baksa ba gipin political party baksa bakrime susaana gita Congress-o maming miksongani dongja ine A·dok Congress president, Vincent H Pala aganaha.
“Chinga darang party baksaba pre-poll alliance-ko dakna miksongani dongja. Re·baenggipa salrango a·doko Congress-ko maikae bilakdapatna man·gen, uani giminsan chinga chanchiaia” ine Pala, koborna ku·wataha.
Ua indakeba aganaha je a·dokni dilgiparang baksa mamingkoba agangrikchenggijade All India Congress Committee, pre-poll alliance-ko darang baksaba dakjawa.
“AICC mamingsaloba draja. State unit-ni nangnikani dongosa uko dakaia,” Meghalaya Pradesh Congress Committee padot aganaha.
Bang·a MLA-rangni party-ko wate katangtokani gimin ua dukde man·rika indiba Congress ka·sne ka·sne, uamangni bimangko bilakatbataienga, Pala aganaha.
“Bang·a dilgiparangan chingni party-o napna am·tokenga. Constituency gimikonin ong·nasipile, chingoniko party tikit am·giparangkoba chinga man·soenga. Indake party-oniko a·rikgala man·gipa sakbonga MLA-rangni constituency-rangoniko mangba chinga namgipa candidate-rangko man·enga,” Congress dilgipa aganaha.
Unomitingo, uni party-oniko dilgiparangko kimale rimangengani gimin National People’s Party aro BJP-ni budi dakanirangna matnange aganaha. Uamang mitam dilgiparangko man·angenga indiba party-na kakket ong·gipa worker-rangkode man·angjaenga, agandapaha.
A·dokni manderang re·anggipa election-ba Congress-na chakpaaniko on·aha ine gisik ra·ate aganengon, manderang ianchangoba chingo ka·donganiko donkugen. “Party-ko tarina chinga somoirangko namen man·aha,” ua aganaha.
