SHILLONG: NPP-ni dilgipa aro Meghalaya a·dokni Deputy Chief Minister Prestone Tynsong-ba United Democratic Party (UDP)-o napskana sienga ine jangbingbanganirangko knasona man·engon, re·baenggipa 2023 bilsini Assembly election-o UDP-oni susana sikenggipa manderangde re·bae parakena man·aigen ine Sukrobar salo, UDP-ni president Metbah Lyngdoh parakataha.
NPP-ni dilgipa Prestone Tynsong, UDP-o napangskanaba gnang ine jangbingbanganirangko knasona man·engoba da·o dipet ua UDP-o napna miksonganirang dongja ine UDP-ni president jegalatskaahachim.
“Re·baenggipa Assembly election-o saoba UDP-ni tikito susana sikenga ong·ode chingona re·bae parakena man·aigen aro chinga iako name nipiltaigen,” ine Lyngdoh, kobor ra·timgiparangna parakataha.
TMC-ko dilenggiparangoni saoba UDP-o napna sikenggiparang dongama ine sing·on, UDP-o napna sike agangrikgipa manderang dingtang dingtang dolrangoni donga ine Lyngdoh parakataha.
“Chinga ia pilakkon name nipilenga maina niam gita chinga pilak kamkon ka·enga,” ine ua aganaha.
Meghalaya a·doko TMC-ni bang·bata dilgiparangan doltangoni ong·kate UDP aro gipin dolrango napskana miksongenga ine jangbingbangenggipa kattarangna UDP-ni president, ia kattarangko aganaha.
TMC gita dakgipa gital dolrangni re·baanichi Meghalaya a·doko UDP-na maming neng·nikani dongjawa ine janapatengon, Meghalaya a·doko UDP dolmangmangsan regional party ong·e manderangna dangdike on·nagipa dol ong·ani gimin manderang UDP-o ka·dongchakbatenga ine Lyngdoh aganaha.
Meghalaya a·doko UDP bilakbatrorobaengaha aro bang·a dilgiparangan UDP-o napna miksonganirang dongenga ineba UDP-ni president parakataha.