Tura: Bilsi gni ong·napile tangkako gamjani dongchipani gimin jolni contractor-ni kosako West Garo Hills Tura labour department-o badi ka·aha.
Bokmagre petrol pump-oni Babupara (CS’s office sepang)ona rikgipa ramao kam ka·giparangna gamna nanggni lak 4.35 tangkako gamjani gimin Butbar salo Bimal Agarwala aro Deepak Agarwala-mangni kosako badi ka·aha. Bilsi 2020 October jaonin rama tariani kamko a·bachengatahachim.
Meghalaya aro Assam-oni sak 40 hajira kam ka·giparang, project-o kam ka·tokaha.
Contractor-rang kam ka·giparang togiaha ine matnange badi ka·a baksana FIR-koba segataha.
“Rama project-ko bilsi 2021 April jaona matchotna chinga sal-wal neng·skime kam ka·beaha. Kam ka·anina chinga chu·gimik lak 12.5 tangkako gamna gita nanga, indiba lak 8.15 tangkakosan gamkuenga. Lak 4.35 -ko man·kugen ine kam ka·giparang FIR-o janapaha.
Project-ko nirokgipa ba supervisor, Hamildul Islam, labour office-o badi ka·aha. Kam ka·giparangoni sinjetaniko man·ani a·sel, ua contractor-rang baksa adita chang agangrikna jotton ka·ahachim indiba man·jaha.
Changni chang jotton ka·omangba, kam ka·giparangna tangkako gamjaha.
“Minggipin Bimal Agarwala, police-na badi ka·a ong·ode, rakgipa ja·kuko de·gen ineba angko ka·mikkenataha ine Hamidul, uni badi ka·anio janapaha. Iarangni gisepon Hamidul, an·tangni pocket-oniko 30,000 tangkako kam ka·giparangna gamaha, ua tangkakoba on·pilkuja una agreba angko kam ka·ani tangkakoba on·kuja ine agandapaha.
Indake supervisor Hamidul, contractor-rangni kosako ja·ku de·china mol·molaha aro ta·raken uamangni man·a nanggni tangkako watchina mol·molaha.
