TURA: National People’s Party (NPP)-na kam ka·enggiparang aro contractor-rang, manderangni namgnina ra·gatgipa MPLAD aro SUWP-ni tangka paisarangko jakkalsrete a·dokni Chief Minister Conrad K Sangma aro Tura-ni MP Agatha K Sangma-ko cha·bokenga ine Robibar attamo, Tura-ni BJP MDC Bernard N Marak matnangataha.
Marak-ni parakatani gitade, NPP-na kam ka·enggipa manderang aro contractor-rang, MPLAD aro SUWP-ni bang·a tangka paisarangko oke ra·enga indiba ia project-rangni bidingo RTI ka·e am·sandiode ia pilak project-rangan ‘me·mang’ project-rangsan ong·aiachim.
“SUWP (2018-19)-ni matchotgimin project aro 2017-18 bilsio ka·enggipa MPLAD-ni kamrang ine mesokgipa project-rangni bidingo Tura Municipal Board (TMB)-o RTI ka·e am·sandion, ia kamrangara dongan dongjachim. Matchotgimin kamrang ine mesokgipa project-rangoni Kongbe Adingo donggipa gopramna nok ge·sako rikna gita 2017-18 bilsio MPLAD-ni ning·o gong lak 3-ko NPP-ni worker saksa man·aha aro Kongbe Ading gopramon RCC shed-ko rikna gitaba ua CM-ni SUWP-ni ning·o gong lak 1-ko man·dapahachim. Ia kamrangko RTI-o matchotaha ine janapaha indiba ia gopramo donggipa nok te·saba gittimo songdongenggipa manderangni rikgipa noksa ong·achim,” ine Tura-ni MDC parakataha.
Ia gopramara Kongbe Adingnisa ong·e ian Municipality-ni ning·o ga·akjachim indiba ia kamko man·gipa mande, ia kamko Municipality-ni gitasa man·skaaha aro official-rangba maming am·sandichenga gri ia kamko matchotaha ine certify ka·aha ineba Marak parakataha.
Tura MDC-ni parakatani gitade, ia kamni bidingo parakjachina gita NPP-ni worker-rang, ia songo donggipa manderangko didiahani giminsa ua iako songbadrango parakatskana nangaha.
“Contractor-ni kosako aro NPP worker-rangni kosako CM aro MP nanga gita ja·kurangko de·china chinga NPP worker-ni bimingko iano parakatjaenga indiba ia mandeni kosako maming ja·kurangko de·jagenchimode aino pangchake ja·kurangko de·na draatako man·gen,” ineba Marak parakataha.
South Tura constituency-o MPLAD aro SUWP-ni iandakgipa me·mang project-rang bang·en donga ineba BJP MDC matnangataha.