SHILLONG: Meghalaya a·doko North Eastern Hill University (NEHU)-ni ning·o chalaienggipa college-rangkode ia bilsio Common University Entrance Test (CUET) porikkaoniko watna gita ma·mong sorkari ku·rachakaniko on·ataha ine Sombar salo, a·dokni Chief Minister Conrad K Sangma parakataha.
University Grants Commission (UGC)-ni ge·etanio pangchake NEHU-ni ning·o donggipa dingtang dingtang college-rango undergraduate course-rangna ia 2022-23 bilsionin Common University Entrance Test (CUET) 2022-ko a·bachengatgnok ine u·iatani ja·man, dingtang dingtang dolrang iako jegalattokahachim aro ia porikkako ra·na skang chatro chatrirangna komibeoba bilsignimang somoiko on·chengna gita sorkariko didiattokahachim ine nikna man·a.
Indake ong·engon, Sombar salo a·dokni Chief Minister Conrad Sangma, ma·mongni Union Education Minister Dharmendra Pradhan-ko gronge, ia bilsiode Meghalaya a·dokko CUET-oniko watchina mol·moleaha aro ua ia bilsiode NEHU-ni ning·o sorkarini dakchakenggipa aro pilak private college-rangkon CUET-oniko watna gita ku·rachakataha ine u·iataha.
Iani bidingo ma·mong sorkari bakan u·iataniko on·atgen indiba ian NEHU-ni ning·o a·dok sorkarini dakchakanichi chalaienggipa aro private college-rangnasan ong·aigen aro gipin central university-rangni ning·o chalaienggipa college-rangode CUET porikkako ra·angaigen ine Chief Minister parakataha.
Meghalaya a·doko bang·bata college-rangan NEHU-ni ning·o chalaienggipa college-rangsa ong·achim aro ia college-rango undergraduate course-na admission ra·enggipa chatro chatrirang neng·nikanirangko man·jana gita adita salrangna skangsan a·dok sorkari, ia bilsiode Meghalaya a·dokko CUET-oniko watkuchina mol·molatahachim.
Ia bilsio undergraduate course-rangna CUET porikkako tanggitik UGC-ni gita u·iataniko on·ahani gimin college-rango admission ra·na nangenggipa chatro chatrirang neng·nikanirangko man·tokengahachim.
