SHILLONG: Meghalaya a·dokni college-rangko Common University Entrance Test (CUET)-oniko watna gita ma·mong sorkarini ku·rachakaniko on·atani ja·man, Meghalaya sorkarini dakchake on·enggipa college ba private college-rango undergraduate course-rangko dakna admission ra·enggipa chatro chatrirangde ia CUET porikkako sena nangjawa ine Mongolbar salo, a·dokni Chief Minister Conrad K Sangma, talataniko on·angaha.
“Ia college-rangnade maming dongimin somoirang da·o dipet dongja aro ia college-rangode CUET porikkako sena nangjawa. NEHU-o admission ra·na nanggijagipa college-ni chatro chatrirangde mikkang bilsirangoba ia CUET porikkako sena nangjawa,” ine Sangma, kobor ra·timgipa manderangna parakataha.
Chief Minister-ni parakatani gitade, central university-o bak ong·enggipa pilak college-rangan CUET porikkako sena nangtelenga ine ua Sombar salo, ma·mongni Union Education Minister Dharmendra Pradhan-na aganbaaha.
Union Education Minister an·tangba, a·dok sorkarini dakchakenggipa college-rango ba private college-rango undergraduate course-na admission ra·enggipa chatro chatrirangna CUET porikka ong·ataniko ong·nikjaenga ine Sangma aganaha.
Iani bidingo toe aganangengon, NEHU-oni km 200 chel·ao donggipa college-rango poraienggipa chatro chatrirangde NEHU-o poraina skani aro dorgastokoba galjawa maina uamangde an·tangtangni a·jao ba joltangtangon dongna nangnikbattokaigen ine Chief Minister parakataha.
“Uni gimin iandakgipa chatro chatrirangde maina ia porikkako sena nanggen? Meghalaya a·doko donggipa 90 percent college-rangde ia CUET-ko sena nanggiparang ong·jawa,” ine Sangma talataniko on·angaha.
Indake ong·engon, je chatro chatrirangan NEHU-ni ning·o chalaienggipa college-rango UG course-na admission-ko ra·na nangengachim, uandakgipa chatro chatrirangde ia CUET-ko sena nangskagen ineba Chief Minister parakataha.
Chatro chatrirang jemangan, central university-rango ba Law College ba Agriculture College gita dakgipa Shillong aro Tura NEHU campus-ni ning·o chalaienggipa college-rango poraina miksongengachim, uandakgipa chatro chatrirangde CUET porikkako sena nanggen ineba Chief Minister parakataha.