SHILLONG: Meghalaya a·dokni Khasi aro Garo ku·sikrangkoba Constitution-ni Eighth Schedule-o ra·gatna nangengani gimin Budbar salo, a·dokni Chief Minister Conrad K Sangma, a·songni President Ram Nath Kovind-na talataniko on·angaha.
Budbar salo a·songni President-ba Bodo Sahitya Sabha-ni chang 61-gipa bilsini tom·bimonganio bakko ra·na gita Assam a·dokni Tamulpur a·jaona re·baaha aro ia cholko ra·e, Meghalaya a·dokni Chief Minister, an·tangni jinmana aganprakanio, Khasi aro Garo ku·sikrangkoba Eighth Schedule-o ra·gatna nangengani gimin aganangaha.
“Dingtang dingtang jatrangni ku·sikko Eighth Schedule-o ra·gataniara an·chingni dal·begipa a·songo meli nangrimaniko bilakbatatgen ine anga an·tangde bebera·a,” ine Sangma aganaha.
Khasi aro Garo ku·sikrangkoba Eighth Schedule-o ra·gatna nangchongmotenga ine janapangengon, Garo aro Bodo ku·sikrangni apsanangani giminba Conrad, ia tom·anio jinmana talate on·angaha.
Salgro salaram a·dokrango songdongenggipa manderangni nangnikanirangkoba knachakchina a·songni President-ko didiangengon, ia jolrango songdongenggipa manderangni ku·sik aro daka rikanirangko chel·chakna aro tang·doatna man·na gita ia jolrango jakkalgipa ku·sikrangkoba Eighth Schedule-o ra·gatchina a·dokni Chief Minister mol·molataha.
“Garo aro Khasi ku·sikrangkosan ong·aigija salgro salaram a·dokrango donggipa dingtang dingtang jatrangni ku·sikkoba Eighth Schedule-o ra·gatchina anga mol·molenga. Ia jatranga chonchongiparang ong·genchimoba uamangni ku·aganani aro daka rikanichisa uamangni ong·baaniko an·ching ma·sia,” ine Sangma aganaha.
Jatni ku·aganian jatni ong·aniko mesokani ong·a ineba Sangma aganaha.
Bodo Sahitya Sabha-ko mittelpile aganangengon, uamangni gisiko nangbee kamko ka·anichi Bodo ku·sik namroro silrorobana man·aha aro see rakkina man·aha ine Meghalaya Chief Minister parakataha.
Ia tom·bimonganiko ong·atanio dongpae bakko ra·anggipa gipin manderangara, Assam-ni Governor Prof Jagdish Mukhi, Assam-ni Chief Minister Himanta Biswa Sarma, Sikkim-ni Chief Minister Prem Singh Tamang, Assam Assembly-ni Speaker Biswajit Daimari, MP-rang, MLA-rang aro Bangladesh baksana Nepal a·songni membor-rang ong·a.
