SHILLONG: Meghalaya a·doko dingtang dingtang dolrangan re·baenggipa 2023 bilsini Assembly election-na tarisamsotokengahaon, gipin dolni sakbri MLA-rang BJP-o napna sienga ine BJP-ni state president Ernest Mawrie a·kangataha.
“Mitam MLA-rang ching dolona re·bana nangnikenga aro iani gimin anga parakatmanaha. A·doko anti-defection law dongani gimin ia MLA-rang da·o dipetde BJP-o napkujanaba gnang indiba July jani ja·manode uamang chingona re·bagnok,” ine Mawrie parakataha.
Ia MLA sakbride ru·uta somoirangna skangan BJP-o napna gita an·tangtangni manderangko agangrikna watataha ine talataniko on·angengon, ia MLA-rang gipin dolrangni membor-rangsa ong·ani gimin da·o dipet uamangni bimingrangko parakna man·kujawa ine BJP-ni state president parakataha.
BJP-ni MLA sakgni gipin dolrango napskana miksongenga ine agananiko jegalatengon, “Ian kakket ong·ja maina da·o dipet chingni membor-rang pilakan ku·cholsan ong·enga. Chingni dol da·o dipet ku·cholsan ong·e dongenga aro uamang BJP-ni tikiton susataigen,” ine Mawrie parakataha.
Gipin MLA-rangkoba BJP-ni dilgiparang, BJP-o napchina didiahachim ine janapatengon, uamang BJP-o napna sikgenchimode uamangna pangnan do·gako oe donaigen ine Mawrie parakataha.
BJP-ni dilgipa AL Hek baksa election-o susana gita BJP-ni general secretary-rangoni saksade NPP-o napaha ine agangipani gimin janapatengon, iani bidingo ua knaade knaaha indiba baditana kingking kakket ong·a name ma·sikujaenga ine BJP-ni state president parakataha.
Indake ong·engon, iandakgipa kattarangko agane roaigija a·doko BJP-ko bilakbatatchina gita a·dokni BJP dilgiparangko BJP-ni Meghalaya in-charge M Chuba Ao didiatskaaha.
Batanggimin adita jarangna doltangni ning·on meligrikgijanirang ong·angahachim ine janapatengon, “Iandake politics-ni gimin agane roaianichide kam ong·jawa. Politics-ni gita agane rona gipin dolrangba nambate man·aia indiba BJP-ni niksamsoanian Meghalaya a·dokni economy-ko tang·doatani aro namroro silroroaniko ra·baanisa ong·engani gimin dilgiparang rake kamko ka·na nangenga,” ine Ao parakataha.