SHILLONG: Shillong songjinmani Harijan colony-o songdongenggiparangko dingtang biapona apjitanio, ia manderangna a·arangko on·china aro nokrangko rikanio korosrangko gamchina gita Harijan Panchayat Committee (HPC)-ni dabianiko Sombar salo, Hynniewtrep Youth Council (HYC) jegalatenba, Harijan Committee-ni dabianirangko ra·chakjachina gita a·dok sorkariko didiangaha.
Iani bidingo HYC-ni dilgiparang Sombar salo, a·dokni Deputy Chief Minister Prestone Tynsong-ko grongenba, Harijan Panchayat Committee-ni dabianirangko chu·sokatjachina gita raken jegalanirangko dakangaha.
HYC-ni president Robertjune Kharjahrin-ni parakatani gitade, a·arangko on·china aro nokrangko rikna gita korosrangko gamchina Harijan Panchayat Committee-ni dabianiara niamni a·palosa ong·engani gimin iako sorkari knachakna gita nangjaengachim.
Apjitatako man·enggipa Harijan colony-ni manderangna quarter-rangko rike on·genchimode uamang maming jegalani dongjawa indiba sorkario kam ka·enggipa pilak manderangnan sorkari, quarter-rangko on·skana nanggen ineba HYC-ni president dabiangaha.
“Da·o dipet sorkario kam ka·enggiparang iandake dabianirang dongkuja, uni gimin HPC-na nok parani tangkarangko on·skae, uamangko uamangni namnikao dongna on·china chinga didienga,” ine Kharjahrin parakataha.
HYC president-ni parakatani gitade, niam gri songdongenggipa manderangkode dongimin niam gita ua biaponiko a·rikgalna nangchongmota ong·jaode mikkangchiba iandake niam gri songdong a·chaanirangko a·doko nikna man·aikugenchim.
Harijan colony-o songdongenggiparangko apjitanio ru·utatengani gimin suk ong·gijaniko parakatengon, ian ia jolrango sorkarini so·sojengjeng ong·taiako senge donga gitasa ong·enga ine Kharjahrin parakataha.
Harijan Panchayat Committee-ni dabianirangko sorkari ra·chakgenchimode uamangba a·a gri ong·e dongenggipa Khasi manderangko sorkarini a·arango dongdraatskagen aro indin nokrangko rike on·skachina dabianggen ineba HYC-ni president mikrakataniko on·angaha.