SHILLONG: Meghalaya a·doko skanggipa changna Lakadong Festival-ko West Jaintia Hills a·jani Laskein-o ong·atangaha aro ia manianio a·dokni Chief Minister Conrad K Sangma-ba dongpae bak ra·angaha.
Ia manianio a·dokni Chief Minister, jinmana aganprakengon, salgro salaram a·dokrango skanggipa changna holdioniko ‘curcumin’ bikotaniko Meghalaya-o a·bachengataha aro mikkangchi iana a·doko a·gilsak gimikon ra·chakna man·gipa kolko ra·gatanggen ine parakataha.
Lakadong Mission-ni bak gita ia tom·anio a·dokni Chief Minister, dingtangmancha Turmeric Washer aro Polisher machine-rangko Meghalaya Farmers (Empowerment) Commission-ni seokgimin dolbri Lakadong Farming Society-rangna pakwate on·angjolaha. Lakadong Mission-ni ning·o Collective Marketing Centre-rangkoba Thadmuthlong, Shangpung-o aro Laskein, Mowtryshiah-o ua kulie on·angjolaha.
Ia Lakadong Festival-ko ong·atanio a·dokni Chief Minister baksana Mookaiaw-ni MLA Nurjorki Sungoh, Agriculture & Famil Welfare-ni Commissioner & Secretary KN Kumar aro gipin dilgiparangba dongpae bak ra·angaha.
Ia manianio a·dokni Chief Minister, Lakadong holdiko game ge·e cha·giparangna aganprakangengon, ia Lakadong Festival-ara, bilsibrina skang, Lakadong holdiko game ge·e cha·giparangni dingtang dingtang neng·nikanirangko namatna re·chakataniko bon·atani gita ong·enga ine parakangaha.
“A·doko Lakadong holdi ge·e man·aniko bariatna gita ua somoion mission-ni bewalo kamko ka·chakatna sorkari tik ka·aha,” ine Sangma aganaha.
Dingtang dingtang department-rangni gisepo ku·mong nangrime kam ka·ani dongjani a·sel bang·a changon nanga gita kamrangko chu·sokatna man·rongja ineba Chief Minister parakataha.
“Game ge·e cha·enggiparangni man·gniko tang·doatna gita training-rangko on·e gama ge·anirangko bariatanian an·chingni nisan ong·na nanga,” ine ua aganaha.
Meghalaya a·dokni bilsi 75 gapaniko maniani somoio GSDP-ni gita Meghalaya a·dokba a·song gimiko nambatsranggipa dam 10 a·dokrangoni damsa ong·na nanga ineba Chief Minister parakataha.
A·doko Curcumin testing unit-ko a·bachengatahani gimin an·tangni kusi ong·aniko parakatengon, skangni somoirangode curcumin-ko porikka ra·e nina gita Kolkata-onasa watatna nangachim indiba da·ode a·doktangon iako dakna man·engaha ine Chief Minister parakataha.
