RESUBELPARA: 2014 bilsio chi bananganichi, North Garo Hills a·jao nosto ka·a man·gipa skul nokko da·onan tarie on·pilkujaengani a·sel ia skulo poraienggipa chatro chatrirangsan ong·aigija skigiparangba neng·nikanirangko chagrongna nangtokenga ine kobor on·aha.
Ia skulara, North Garo Hills a·jani Dainadubi jolo donggipa Bangsi Apal LP skul ong·achim aro ia skulko chi aro balwarang pe·angani somoio a·doko Congress dolni dilanichi sorkariko rikengachim.
Ua somoio mikka balwarang ta·rakangenba, skulni nokkingko man·angaha aro skul nokni do·ga kelkirangkoba pe·angahachim.
Ia skul nokni nosto ong·aoni da·o bilsi chetmang ong·pilengahaoba da·onan ia skul nokko taripile on·a dongkujaenga ine kobor on·skaaha.
“Ua somoio chinga NGH-ni gitcham deputy commissioner-na ia skulni obostani gimin u·iatahachim indiba skul nokko taripilna gita tangka paisarangko man·sojaha. Ua somoio mikka balwa ta·rakanganichi skulni classroom-rang namen nosto ka·ako man·tokahani a·sel class-rangko ra·na man·jaha. Indake ong·genchimoba SSA section namkuengani giminsa chinga ia classroom-rangkoba chingni bi·sarangna skie on·na jotton ka·enga,” ine skulni skigipa saksa parakataha.
Ia skul nokko taripile on·na nangengani gimin baditaba changde Education department-ni official-rangna u·iatahachim aro 2019 bilsio da·o ong·enggipa a·dokni Chief Minister Conrad Sangma-naba u·iatahachim indiba da·onan maming aganchakanirang dongkujaengachim ine Dainadubi Circle Youth Organisation (DCYO)-ni president Gilsang D Shira parakatskaaha.
Iani ja·mano DCYO-ni president an·tangan social media-rango ia skulni obostani bidingo jinmana parakataha aro da·o ia skulni bidingo official-rangni aganchakaniko man·engaha ine kobor on·aha.
“Ia skulna proposal-ko Education-ni dal·batgipa official-rangna watataha aro chinga namgipa aganchakaniko man·sona ka·dongenga,” ine North Garo Hills education office-oni kobor on·timgiparang parakataha.
