AMPATI: South West Garo Hills a·jaoba Meghalaya a·dokni bilsi 50 gapaniko May-ni 20 tarik Sukrobar salo, District Administration aro dingtang dingtang department-rang nangrimenba, Ampati Mini Stadium-o manidilangna sienga.
Ia manianiko pring 10:30 bajioni a·bachengatanggen, jeon Tura-ni MP Agatha K Sangma, mongsonggipa sokgipa ong·e bakko ra·anggen.
Meghalaya a·dokni bilsi 50 gapaniko manianio dingtang dingtang program-rang, jekai District Level Industrial & Department Exhibition, jatni kal·susaanirang, bijak song·susaani, Talent Hunt aro uandakgipa program-rangko ong·atanggen.
Attamni bako dingtangmancha Musical Nite-ko ong·atanggen, jeon Da Suraka, Enosh, Saldorik aro Rough Road, gitrangko ring·e manderangko an·saoatanggen.
Talent Hunt-na audition-ko da·al May 19 tarik pring 11:00 bajionin Ampati DC Office sambao donggipa MFC-o ong·atenga.
Iana skangba, Meghalaya a·dokni bilsi 50 gapaniko maniani bak gita South West Garo Hills a·jani dingtang dingtang block-rango dingtang dingtang program-rangko ong·atangaha ine u·iataha.
