TURA: Gokolgre-oni Achotchonggre-ona dakanggipa PMGSY ramako da·onan tarikujaengani a·sel jolo songdongenggipa manderang aro ia ramako re·ruraenggipa manderang neng·nikanirangko man·tokna nangengaha ine Garoland State Movement Committee (GSMC) Pedaldoba regional unit parakatenba, ia ramako somoi gita tarie on·china dabiangaha.
Ia ramako tarigija donchipengani gimin re·anggipa Sonibar salo, GSMC Pedaldoba regional unit, Achotchonggre songni AYWO, AHAM aro GSU dolrang, jolo songdongenggipa manderang, Nokmarang aro Gaoburarang baksa Achotchonggre community hall-o tom·e chanchirimangenba, ia ramako ta·raken matchotatchina dabiangtokaha ine u·iataha.
GSMC Pedaldoba regional unit-ni chairman Rimjen Ch Sangma-ni parakatani gitade, ia ramako tarina gita bilsi bonga somoiko on·enba, ia 2022 bilsini December jani gisepon matchotatchina ge·etaniko on·ahachim indiba da·o bon·kamgipa bilsi ong·pilengahaoba, ia ramani culvert, dolong aro a·ani kamrangko man·chape maming kamrang matchotkujaengachim.
“Ia ramani maming kamrangan da·ona be·en pil·kujaengani gimin ia kamko jako ra·e ka·enggipa kamtango gisik nangjaenga ine chinga nikatna man·enga. Ia ramako tarianirang da·onan maming ong·kujaengani a·sel songni manderang, aro mongsongbate office-rangchi, skulrangchi aro sanna bannanirangko ra·na re·ruraenggipa manderang pilakan neng·nikanirangko chagrongna nangtokengaha,” ine GSMC Pedaldoba unit-ni chairman parakatenba, ia ramako tarienggipa contractor-ni kosako rakgipa ja·kurangko de·china dabiangaha
Achotchonggre-ona dakanggipa ramako somoi gita tarichina NGO-rang dabia
Date:
Share post:
