SHILLONG: Meghalaya a·doko kajina man·aniko gong kror 25-chi bariatna miksonge Indian-Made Foreign Liquor (IMFL) ba India a·songo tarigipa foreign churangko dingtang dingtang gadangrango donatna gita Budbar salo a·dokni Cabinet ra·chakahani gimin da·o chuni damrang adita barianggnok.
Cabinet tom·a matchotani ja·mano kobor ra·timgiparangna talataniko on·angengon, Meghalaya Bonded Warehouse Rules-ni Rule 44 (10) aro advalorem, chuni MVAT-rangko taripdapanichi IMFL-ni dingtang dingtang rokomrangko gadang sualpiltaina sorkari tik ka·angaha ine a·dokni Chief Minister Conrad K Sangma parakataha.
Chuni damrangko bariatengani gimin talataniko on·angengon, batanggimin jarango samba jolo donggipa a·dokrangoba chuni damrang bariahani gimin aro a·doko kajina man·aniko bariatna gita churangko reclassify ka·taiaha aro mitam chuni damrangko bariataha ine Chief Minister parakataha.
Chuni damrang bang·gija rakbatgnok ine janapatengon, chuni damrangko bariatanichi gong kror 25-na baten sorkari kajinarangko man·dapgnok ine Chief Minister parakataha.
Chuni damrang rokomni kri 3-4%-oni 8-9%-ona barignok ineba Chief Minister parakataha.