TURA: Mendipathar-ni MLA Marthon J Sangma, National People’s Party (NPP)-o napna miksongskaenga ine jangbingbanganirangko knasona man·ani ja·man Mendipathar jolrango NPP-na kam ka·enggipa manderang raken jegalsotokskaaha aro ia MLA-ko NPP-o rimnapjachina gita a·dokni Chief Minister aro NPP-ni national president Conrad K Sangma-ko didiataha.
Koborko on·ani gitade, re·baenggipa 2023 bilsini Assembly election-o NPP-oni susana gita Mendipathar-ni MLA ong·enggipa Marthon Sangma, NPP-o napskana miksongengachim.
Mendipathar-ni MLA Marthon Sangma, adita salrangna skangsan, Congress doloni ong·kate All India Trinamool Congress (AITC)-o napskaahachim indiba da·o ua AITC-oni ong·kate NPP-o napskana miksongenga ine jangbingbanganirangko knasoon, Mendipathar-o NPP-na kam ka·enggipa manderang uko raken jegalsona a·bachengtokskaaha.
Indake ong·genchimoba, an·tangni kosako jangbingbangenggipa kattarangko Mendipathar-ni AITC MLA an·tangde jegalatskaaha aro da·o dipet uni election-o susagniko agansamsona gita somoirang ong·kuja ine parakataha.
Mendipathar-ni MLA, NPP-o napskana miksongenga ine jangbingbanganirangko knasoani ja·man NPP-na kam ka·enggipa dolsa manderang jegalatenba, uko NPP-o rimnapjachina gita Conrad Sangma-ko didiataha.
“Marthon-ni NPP-o napna miksongenganiko chinga knasoaha indiba NPP-na kam ka·enggipa manderang bang·batan iana kusi ong·tokjaenga. Chinga ia MLA baksa kamko ka·rimna kusi ong·ja aro uko NPP-o rimnapjachina Conrad Sangma-ko mol·molenga. Chinga ia MLA-na NPP-ni tikitko on·jachina mol·molenga, ong·jaode chingo candidate sakgittam donggnok,” ine ia MLA-ni NPP-o napaniko jegalenggipa manderang parakataha.
