TURA: Tura-ni Lower Mission Compound-ona dakanggipa rama namsrangjaengahani gimin joltangni MLA, chong·motan North Tura-ni MLA-ni dakchakanina senge dongahaoba maming dakchakanirangko man·jahani gimin jolni manderang an·tangtangan ia ramako jinma gilchimonge taridaptokaha ine kobor on·aha.
Jolo songdongenggipa manderangni u·iatani gitade, Lower Mission Compound-ona dakanggipa rama namsrangjahani gimin jolni manderang, North Tura-ni MLA Thomas A Sangma-na u·iaton, ua an·tangan re·anggipa May-ni 2 tariko, ia ramana tangka paisarangko allot ka·manjok aro ta·raken ia ramako tarignok ine Lower Mission Compound-ni manderangna ku·rachakaniko on·ahachim. Ua somoio da·o sorkariko dilenggipa National People’s Party (NPP)-ni saksa dilgipa Dabo Marak-ba dongpaahachim ine jolni manderang parakataha.
Indake ong·engon, MLA-ni ku·chakaniko man·e, jolni dilgiparang, PWD (Roads)-ni official-rangko changgni grongeahachim aro ia ramako mikkang antion tarignok ine bon·chipataiani gimin jolo songdongenggipa manderang, jinma apsan gilchimonge ia ramako Bristibar salo taritokaha ine jolni manderang u·iataha.
“Ia ramani obostako chinga salanti re·ruraenggipa manderangsa ma·sienga. Chingni MLA chingna ia ramako tarignok ine ku·chakahani gimin chinga uo ka·dongchake indita salrangna sengahachim indiba salsabatroro chingni neng·nikanirang batroroengaha aro chinga maming dakchakaniko man·teljawaha ine nikenba ia ramako an·tangtangan tarina nangao ga·akaha,” ine Lower Mission Compound-o songdongenggipa manderangoni saksa parakataha.
MLA-ni dakchakaniko man·jae Lower Mission Compd-ni ramako an·tangtang taridapa
Date:
Share post:
