SHILLONG: Da·oni Mawkyrwat-ni HSPDP legislator aro PHE Minister, Renikton L. Tongkhar UDP-o napna miksongenga ingipani bidingo mamingkoba ma·sikuja ine UDP president, Metbah Lyngdoh Sukrobaro aganaha.
“Da·odipetode anga iarangni bidingo mamingkoba ma·sikuja. Bebegita ua party-ona re·baode, angni agana gita, da·oni bang·a MLA-rangan UDP-ona napna am·tokenga ingipa kakketan ong·gnok” ineba Tongkhar, UDP-o napna tarienga ingipa koborni gimin Lyngdoh aganaha.
Indakeba nikatna man·a je Tongkhar-ko namnikgiparangoni, jerangan HSPDP Mawkyrwat unit-ni dilgiparangba ong·achim, re·anggipa May 23 tariko tom·anio UDP Mawkyrwat Circle-ni president-na aganaha je re·baenggipa 2023 election-na tarisoa gita Tongkhar, UDP-o napanggen.
Indake ong·genchimoba, ia ja·ku de·anirango UDP Mawkyrwat Circle-ni gisepo namade ong·jaenga, maina bang·bata dilgiparangan Tongkhar-ko rimnapna UDP central body-ni ja·ku de·aniko namniktokskajaengchim.
Koborrangko man·ani gitade, ia ja·ku de·anirangna namnikgijaniko mesokna gita UDP Mawkyrwat Circle-ni bang·bata dilgiparangan mikkang bang·gija salrangni gisepon kam wattokna miksongskaenga.
