TURA: Assam-o songdongenggipa gipin jat mande saksa, affidavit ka·enba, A·chik mahariko ra·an baksana Muslim-oni Christian toromko ra·skaahani gimin Rongrong-ni AITC MDC Rinaldo K Sangma jegalataha.
Assam-ni Osman Goni minggipa mande saksa, Tribal-ni status ba gadangko man·na gita affidavit ka·enba, an·tangni bimingko Osman Goni Marak ine mingsreskaahachim aro an·tangni toromkoba Christian ine ra·skaahachim. Iani bidingo social media-rango gipangani ja·man, bang·a manderangan ia mandeni kamko jegalattokaha aro Rongrong MDC-ba iani bidingo raken jegalataha.
“Osman Goni minggipa mandeni affidavit ka·e, A·chik mahariko ra·ani aro Muslim-oni Christian toromko ra·skaaniara namen jegalna nangani kam ong·aha maina ua Meghalaya a·doko Tribal-rangna on·enggipa cholrangko ra·nasa iako dakaha,” ine Rinaldo parakataha.
Rongrong MDC-ni parakatani gitade, mandeni jatkode uni atchigipa nokdangonikosa channa man·a aro iako dingtangatna man·ja ine a·songo Supreme Court-ni dongimin niaman dongani gimin Usman Goni-oni Usman Goni Marak ine mingsreaniara niamko pe·ani gitasa ong·engachim.
“A·chikrango chengonin ja·rikbaenggipa dingtang dingtang niam reti aro daka rikanirang gnang aro Marak ma·chongoni maming ra·chakani gri bimingko ra·aniara A·chik jatni ra·chakna man·gijani ong·a,” ine Sangma parakataha.
Indake ong·engon, mikkangchi iandake niam gri biming mingsreanirangko champengna gita nambate nirok sandiangchina gita Rongrong MDC, Meghalaya sorkariko, Garo Hills-ni district administration-rangko, Garo Hills Autonomous District Council-ko aro Garo Hills-ni Bar association-rangko didiataha.
Garo Customary Law (GCL)-ko ta·raken ra·gatchina aro dingtang electoral roll-ko tarichina gitaba ua GHADC-ni CEM-ko didiataha.
Comments are closed.