SHILLONG: Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkariko, tangka paisa jakkalsretanirangna, niam gri koela badinganirangna aro dingtang dingtang kamrangna matnangengon, MDA sorkarina chakpaaniko watani bidingo bakan a·dokni BJP dol chanchianggen aro iani bidingo ma·mongni dilgiparangna u·iatgen ine BJP-ni state president Ernest Mawrie parakataha.
Adita salrangna skang, BJP-ni national general secretary Ajay Jamwal baksa state BJP-ni tom·anio pilak executive membor-rang aro BJP-ni district president-rangba, MDA-o bakrimaniko watchina diditokaha ine janapatengon, “Anga salsa salgnini gisepon chingni MLA sakgni baksa tom·enba iani bidingo chanchianggen. Chinga MLA sakgnini nangnikaniko ra·enba ja·mano Delhi-ona u·iate, uamangni nangnikani gita ja·kuko de·anggen,” ine Mawrie parakataha.
2018 bilsio MDA sorkariko rikchengani somoio Delhi-ni pilak dilgiparangba dongpaachim ine janapatengon, MDA-o bakrimaniko watna skangba ma·mongni dilgiparangna u·iatchengna nanggen aro uamangsa MDA-o bak ong·angkugenma ma ra·pilgenma ukode tik ka·gen ine BJP-ni state president parakataha.
“Dingtang dingtang obostarangko an·ching songbadrangoniko niksona man·enga aro iana BJP-ni dilgiparang gimikan suk ong·tokjaenga. A·doko ong·enga obostarangko manderang an·tangtangan nie ma·sie ra·china,” ine Mawrie aganaha.
BJP dolni ning·o meligrikgijanirang donga aro mitam dilgiparang doloni ong·katna miksongenga ine jangbingbanganirangkoba ua jegalataha.
A·dokni dilgiparang, niam gri koela badinganio jak donga ine matnanganirangko nikna man·engani gimin ian bidingo kakketko ma·sina man·na gita sandirokatchina gitaba a·dokni BJP dol dabiangaha.
“Je dilgiparangkon niam gri koela badinganio jak donga ine biming mingengachim, uamangni bidingo inquiry-ko dakna nangchongmota,” ine Mawrie aganaha.
Niam gri koela badinganina rim·ako man·gipa Balwant Soni ba Bhama baksa a·dokni cabinet minister James PK Sangma jak donga ine adita salrangna skangsan, Guwahati-ni news channel-o jinmana parakatahachim ine nikna man·a.
“Anga ia news report-ko nikmanaha aro iani James Sangma-ko biming mingaha. Iani bidingo anga mamingkoba aganna nanganide dongja indiba chinga BJP dolni gita niam gri koela badinganiko jegalengani gimin iandake matnangenggipani bidingo inquiry dakchina nangnikenga. Sorkari, NGT aro Supreme Court-ni ge·etanirangko manina nanga,” ine BJP-ni state president aganaha.
Comments are closed.