SHILLONG: Meghalaya a·doko National People’s Party (NPP)-chi dilenggipa MDA sorkariko tangka jakkalsretanirangna aro dingtang dingtang ong·gija kamrangna a·dokni BJP dol matnangengon, dolgni gisepo ma·sisretgrikanirangko ma·sie ra·na gita re·baenggipa antio Shillong-ona re·bagen ine Budbar salo, BJP dolni Meghalaya a·dokko nirokenggipa M Chuba Ao parakataha.
Ao-ni parakatani gitade, Meghalaya a·doko NPP aro BJP dolrangni gisepo matnanggrikanirang ong·engani gimin ua re·baenggipa antio, Shillong-ona re·baenba, a·dokni BJP Minister Sanbor Shullai, BJP-ni MLA AL Hek aro state president Ernest Mawrie baksa agangrikanggen.
“Dolgnini gisepo ma·sisretgrikanirangko ma·sie ra·ani ja·man chinga chief minister-ko gronge, ia neng·nikanirangko namatna jotton ka·gen,” ine Ao parakataha.
MDA sorkario bakrimaniko ra·pilgenma ine sing·on, iakode ma·mongni dilgiparangsa nigrike ja·ku de·na bil donga aro state unit-rangde mamingkoba dakna bil dongja ine Meghalaya a·dokni BJP in-charge parakataha.
NPP-chi dilenggipa MDA sorkarina chakpaaniko ra·pilama ra·piljawa uko chanchirimna gita re·anggipa antio BJP-ni executive committee, tom·aniko ong·atangahachim ine nikna man·a.
Meghalaya a·doko tangka jakkalsretanirangna, dingtang dingtang nokrangko rikanirang namjanina aro uandakgipa kamrangna a·dokni BJP dol, NPP-chi dilenggipa MDA sorkariko matnangengon, MDA-ni kamrango kusi ong·jaenga ong·ode BJP dol, MDA-oni ong·katna man·aigen ine a·dokni Chief Minister aro NPP-ni national president Conrad Sangma aganskaahachim.