SHILLONG: Meghalaya a·doko All India Trinamool Congress (AITC)-ko bikotchengaonin ka·sinsin party-ko dal·roroatna gita kamrangko ka·engahaon, AITC-ni national general secretary Abhishek Banerjee-ba re·baenggipa June 16 tariko Shillong-ona re·bae, doltangko bilakbatatna miksongenga.
Banerjee-ni Shillong-ona re·baanio ua Lachumiere-o AITC-ni office-ko kulie on·anggen aro U Soso Tham Auditorium-o AITC-ni tom·bimonganiko ong·atanioba ua party-ni bang·bea manderangna aganprakanggen.
Uni Shillong-ona re·bana sienggipani bidingo AITC-ni Meghalaya president Charles Pyngrope, kobor ra·timgiparangna talataniko on·angengon, AITC-ni mitam dilgiparang doltangko wate katna siengani giminsa namatna gita AITC-ni national general secretary Shillong-ona re·baenga ine agananiko ua jegalataha.
“Chingni national general secretary changsaba Shillong-ona re·baa dongkuja aro uni re·baanio ua dolni dilgiparangko aro dolna kam ka·giparangko grongenba, mikkang bilsini election-na tarisamsoani bidingo agangrikanggen. Ian ong·rongbewalsan ong·aia,” ine Pyngrope aganaha.
Uni salsana re·baani somoio ua Garo Hills-onade re·angjawaha ineba Pyngrope talataniko on·angaha.
Meghalaya a·doko AITC-ni obostara mai rokom ine sing·on, a·doko AITC dal·rorobaenga aro ian opposition dolsa ong·genchimoba NPP-na baten namen dal·bata ine AITC-ni Meghalaya president parakataha.
Re·anggipa bilsini November jao a·dokni gitcham chief minister Mukul Sangma-ni dilanichi sak 12 Congress MLA-rang, AITC-o napgopangani ja·man AITC dolan Meghalaya a·doko mongsonggipa opposition dol ong·skaahachim ine nikna man·a.