Ampati: State Planning Board-ni co-chairman, Ian Botham K Sangma, uni team baksa Sonibar salo South West Garo Hills-o chi man·gipa jolrangona re·ange nirokeaha aro duko ga·akgiparangna mirong aro dingtang dingtang bosturangko suale on·aha.
Co-chairman baksa Betasing C&RD Block-ni BDO Leena Daring Sangma-ba re·angpaaha. Indake a·a rurongdapa a·selo jokkom ong·gipa me·chik jekon Ampati Civil Hospital-o sannaniko dakenga, ukoba grongeaha. Sagipako grongna sokangaon Bothan Sangma, saknaa man·gipa nokdangna aro mni Bristibar pringo a·selo sianggipa nokdangna kalimaniko on·aha aro uamangna dakchakna gita cheque-ko on·aha.
Uandake Co-Chairman, Zikzak C&RD Block aro Darong Adu jolrangonaba re·ange nirokeaha aro ua jolo donggiparang maidakgipa neng·nikarangko man·enga iarangko sing·sandiaha. Aro chibana a·selo duko ga·akgipa nokdangrangko gronge uamang baksa agangrikaha aro uamangna a·dok sorkarini gita man·a dipet dakchakaniko on·na ka·dongataha. Indake ong·engon mni Sukrobar salo Chief Minister Conrad K Sangma-ba Garo Hills a·jao mikka jime waanichi chibana a·sel ong·ani bidingo chanchirimaniko dakna Tura-o tom·aniko ong·atangaha, jeon deputy commissioners, superintendents of police aro West Garo Hills, South West Garo Hills aro South Garo Hills-ni district official-rang bak ra·angtokaha.
District official-rang CM-na district-tangtango ong·gipa obostarangni gimin u·iataha.
Chibanani a·sel road infrastructure ba rama jolrang, nok aro bang·a gam-jinrang, ge·a-gamanirang nosto ong·tokaha ine CM-na u·iate on·aha.
Iarangni gisepo CM Sangma, gimik official-rangkon ta·raken duko ga·akgiparangna dakchakna gita kam ka·china, power line-ko donpilna ba uandakgiparangko ka·china ge·etaha.
Tom·a matchote CM, Tura Civil Hospital-ona re·ange West Garo Hills Gambegre jolo a·a rurongdape sianggipa nokdangna dakchakna gita cheque-ko suale on·aha.
State Planning Board-ni Co-Chairman chiman·gipa jolrangko nirokea
Date:
Share post:
