RESUBELPARA: North Garo Hills a·jani Amerim songo china namen dilgenchimoba da·o Meghalaya Basin Development Authority (MBDA)-ni dakchakanichi, songni manderang chiko man·na a·bachengaha ine kobor on·aha.
Amerim songara Kharkutta-oni kilometre 20-mang chel·ao donggipa song ong·a aro ian a·brio donggipa songsa ong·e, songni manderang pilakni gitan neng·nikanirangko man·enggipa song ong·achim. Ia songona 4 wheel donggipa pik up truck gariosan re·na man·aia aro uaba ramarang namjani a·sel tong·saonasan re·na man·aiani gimin manderang, ja·achisa songona soke re·na man·aiachim.
Ia songo ge 89-mangni gita nokdangrang donga aro ia songona chirangko sale on·ani maming cholrang dongjae, songni jangchio donggipa chiakolonikosan chiko man·ani cholrang dongaiachim.
Ia song aditan dal·kalgipa songe ong·e, songgimikan ia chiakolosan pangchakna gita nangaiachim aro uandaken basakobarangde kosak jolrangoni manderang chirangko ko·na re·baon, manderangni gisepo kajia golmal ong·anirangkoba nikna man·achim ine jolni manderang u·iataha.
Indake ong·genchimoba, ia songni manderangna MBDA-ni gita dingtangmancha cholko ra·gate MeghLAMP-ni ning·o, da·o ia songo donggipa chiakoloniko chiko sale on·na man·engaha ine kobor on·aha.
“Skanggipa chinga ia songo check dam-ko 2019 bilsio tarichengaha indiba songni bang·bata manderangan a·brini kosakgipa bakosa songdong a·chatokani gimin chiko sale on·na man·kujachim. Uni ja·man chinga 2020 bilsini May jao chi saldoani kolko tariaha aro iachi chinga kosakgipa bakrango donggipa nokdangrangnaba chiko sale on·na man·aha,” ine MBDA-ni field engineer Chongme G Momin talatangenba, ia kamko uamang gong lak 2.03 tangkarangchin matchotatna man·aha aro korosrang bang·batan chi saldoani kolko tarianiosa ong·bataha ine parakataha.
Ia chi saldoani project-ko da·o songni manderangnan pakwate on·aha aro kamko songni manderang an·tangtangan da·o nirokengaha ineba ua parakataha.
Ia chiakolo chu·onga gitan chirangko man·aiani gimin chiko saldona gita bijolirangko jakkalna nangja ineba official parakataha.
Indake ong·genchimoba da·o dipet chiko chekani kolrang dongkujani gimin manderang chiko nokni kamrang jekai ba·ra su·na, me·dik sam·dik su·galna, a·pal re·anio jakkalna, au-miksuna aro uandakgipa kamrangnasan jakkalna man·engkua ine kobor on·aha.