TURA: Sombar salo, West Garo Hills Police-ni Anti Narcotics Task Force (ANTF) sipairang, Phulbari jolo donggipa Soleartek Part-II joloniko am·sandienba, pekatgipa samrang baksa nok nokgipako rim·na man·aha ine kobor on·aha.
Phulbari jolo pekatgipa samrangko badingenga ine koborko man·soani ja·man, ANTF-ni sipairang, Soleartek Part-II-o donggipa nok te·saona re·ange am·sandion ia nokoniko bang·bea samrangko man·aha aro uandaken ja·mano police-rang, ia samrangko aro nok nokgipakoba rim·baaha ine kobor on·aha.
Police-rangni u·iatani gitade, ia nokoniko police-rang, gram 161.75 ong·gipa rong 3235 Semdex capsule-rang, gram 46.13 ong·gipa rong 4613 Netaks-10 tablet-rang, gram 5.351 ong·gipa Heroin powder aro te 19 Onerex syrup-rangko man·aha.
Ia a·selni bidingo police-rang mokordoma ka·enba, ning·tubate am·sandianirangko dakengkua ineba police-rang u·iataha.