TURA: Meghalaya a·dokni bilsi 50 gapaniko maniani bak gita Bristibar salo, Dalu C&RD Block baksana Meghalaya State Rural Livelihood Society (MSRLS) aro Meghalaya Basin Management Agency (MBMA) nangrimenba, dingtangmancha program-ko Dalu-o ong·atangaha.
Ia program-ko ong·atanio Dalu-ni MLA Brening Sangma, mongsonggipa sokgipa ong·e bakko ra·angaha aro program-o Dalu block-ni ning·o donggipa dingtang dingtang self help group aro producer group-rangoni sak 500-mangni gita membor-rang bak ra·angtokaha.
Ia program-ko ong·atanio Dalu-ni MLA Brening Sangma, tom·bagiparangna aganprakangengon, lekka porako tang·doatna gita detangtangko didina nangengani gimin ma·a paarangna ku·pattianiko on·angaha.
Dalu jolrango donggipa skulrangni lekka porako on·anio dingtangbaroroengani giminba ua an·tangni kusi ong·aniko parakangaha.
Adita salrangna skang, SSLC porikkani result-ko parakanio Dalu-o donggipa Woodland Secondary School-ni chatro sakgni, Top 20-o biming nakatahachim aro ia chatro sakgnina ia salo dingtangmancha, Dalu MLA-ni jakchi mande ra·pilskaanikoba dakangjolaha.
Ia program-ko ong·atanio PRI Convergence Program-ni ning·o a·bachengatgipa Adult Literacy Campaign-ni namgniko man·gipa sak 16 SHG membor-rangnaba mande ra·pilskaaniko dakangaha.
Indake ong·engon, FOCUS program-ni ning·o dol 30 producer group-rangna gong 21,20,000/- ong·gipa cheque-rangko aro dol 17 SHG-rangnaba gong 26,00,000/- cheque-rangko ia program-o MLA-ni jakchi suale on·angjolaha.
