Harijan Colony-o donggiparangko TB Hospital-ona jitatako ra·chakjawa: BJP

SHILLONG: Harijan Colony-o donggiparangko Mawbah-o donggipa TB Hospital-ona jedakeba jitatgen inako BJP State president, Ernest Mawrie jegalaha.
Kobor ra·timgiparangna aganao uno donggipa manderangko TB hospital-ona jitatna chanchiako party ra·chakjawa ine Mawrie aganaha.
“Ua a·a medical College-nisa ong·a aro maina da·alona kingkingba chinga ge·saba medical college dongja uni gimin chinga college-ko nanga,” Mawrie jean West Shillong-oni election-o susana miksongenga ua aganaha.
Sorkari dakchakna nangnikode nangchongmotgipa tangka-paisako chamatchina party Union Health Minister-ko mol·molgen,  Mawrie aganaha.
“Gitalgipa Medical College-ko rikna ua biapko sorkari rim·kingkingna nanga,’’ maina jemangan uamangni medical-ko poraianirangna chel·begipa a·song Ukraine-ona re·ange poraiaha indakgipa medical-ko poraina sikgiparangna medical college namggni ong·gen ine ua agandapaha.
“Manchienggipa medical college kam ka·e cha·ani chasongo dakchakaniba ong·gen,’’ ua aganaha.
Skangoba Harijan Colony-o donggiparangko Mawbah-o RP Chest (TB) Hospital a·jolona jitna chanchienga ine Deputy Chief Minister Prestone Tynsong-ni aganako West Shillong MLA Mohendro Rapsang-ba jegalaha.
Reid Provincial Chest Hospital ki·sangchi Mawbah-o donggipa jekon TB Hospital ine ma·sia unona jitatna ua a·akosan a·dok sorkariara ma·siaiaha. Ua chanchigipana gipin a·arangko mesokna Urban Affairs department-ni kam ong·a, ua aganaha.
Uamangni ja·ku gipinko de·na skang jitatna manchigipa biapni bidingo sorkarini miksonganiko sengenga ine ru·utgija salo Harijan Panchayat Committee (HPC) aganaha.
Them Iew Mawlong-oniko European Ward-ona jitatgipa nokdang ge·prakna 200 square metre-rangko sorkarini a·a on·ako  aro uamangni nokrangko rikani koros gimikko gamna tik ka·gimiko HPC namnikaha.