SHILLONG: Meghalaya a·doko Registered Unrecognised Political Parties (RUPPs)-rangoni A·chik National Congress (Democratic) dolko biming den·galna gita Election Commission of India (ECI) tik ka·angaha ine Budbar salo official saksa parakataha.
Official-ni u·iatani gitade, India a·songo donggipa dol 111 RUPP-rangoni ANC (Democratic) dolba dolsa ong·paengachim aro ia dolko ECI, June 20 tariko u·iatanichi biming den·galna tik ka·angaha.
Meghalaya a·dokni Chief Electoral Officer (CEO) FR Kharkongor-ni parakatani gitade, a·bachengo ia ANC (Democratic) dolni office-ko Tura-ni Dakopgre-o ine mesokahachim indiba iani bidingo am·sandion, ia office-ko ua biapo man·jahachim.
ANC (Democratic) dolko biming den·galna tik ka·ahaoba, sal 30-ni gisepon pilak nangchongmotgipa lekkarang, audit ka·gimin account-rang, dingtang dingtang report-rang, officer bearer-rangni bimingrang aro bank account-rang baksa CEO-ni office-ona re·ange ANC (Democratic) dolni dongani sakkiko mesokena man·gen ineba Kharkongor parakataha.
Indake ong·engon, Meghalaya a·dokni gipin dolbonga RUPP-rang, chong·motan Garo National Council (GNC), Meghalaya Democratic Party (MDP), North East Social Democratic Party (NESDP), Khun Hynñiewtrep National Awakening Movement (KHNAM) aro Regional Democratic Secular Congress Party (RDSCP) dolrangko biming den·galani bidingo maming ja·kurangko de·na skang, ia dolrangni gimin ECI, am·sandianirangko dakengkua ineba a·dokni CEO parakataha.