TURA: Mikkarang dontonggija jime waanganio chirang bananganichi West Khasi Hills aro Garo Hills-ni gisepo donggipa Moheskola jolrango bang·a manderangan da·o neng·nikanirangko chagrongna nangtokenga ine Garo Students Union (GSU) Moheskola regional unit parakatenba, ia jolni manderangna pilak nanga dakchakanirangko on·china Siju-Rongara-ni MLA Rakkam A Sangma-na sedoataha.
Siju-Rongara-ni MLA-na sedoatgipa chittio GSU Moheskola regional unit-ni president Tirotsing Ch Marak-ni parakatani gitade, mikkarang dontonggija jime waangani a·sel re·anggipa June 17 tarik pring walni 3:00 bajimango rang·san Moheskola jolrango chi banna a·bachengaha aro ua jolrango donggipa nok-jam aro dokkanrangko chi man·angtokahachim.
“Rang·san chirang bananichi manderangni nok-jam aro dokkanrangko chi man·angahani a·sel da·o songni nokni manderang nok-jam gri ong·na aro cha·ani ringani gri ong·na nangtokengaha. Moheskola-ona dakbagipa rama jal·langrangba chi bananio nosto ong·atako man·ahani a·sel da·o bostu salbagipa garirangba ia biaprangona re·bana man·jaenga aro ia jolo cha·ani ringani bosturang bon·angengaha,” ine GSU Moheskola regional unit-ni president parakatenba, ia jolrango songdongenggipa manderangna ta·raken dakchakanirangko on·china Siju-Rongara-ni MLA-ko didiataha.
Comments are closed.