SHILLONG: Ma·mong sorkarini ra·gate on·gipa scheme-rangni bidingo ‘politics’ kal·jachina gita ra·galako man·gipa Congress MLA PT Sawkmie, BJP dolko aganaha.
Meghalaya a·doko ma·mong sorkarini ra·gate on·gipa scheme-rangko name ka·jaenga aro scheme-rangko man·bana gita proposal-rangkoba on·jaenga ine re·anggipa Mongolbar salo, Minority Affairs-ni Union Minister of State (MoS) John Barla, NPP-chi dilenggipa MDA sorkarini kamko matnangatahachim.
Meghalaya a·doko ma·mong sorkarini dingtang dingtang scheme-rangni gimin manderang mamingkon ma·sitokjaenga aro bang·a scheme-rangkon a·dok sorkari ra·bakujaenga ineba Union Minister matnangatahachim.
Meghalaya a·dokni namroro silroroanina Delhi-ona re·ange dingtang dingtang proposal-rangni bidingo agangrikchina gitaba ua a·dok sorkariko didiangahachim.
Indake ong·engon, ma·mong sorkarini ra·gate on·gipa scheme-rangni gimin a·dok sorkarini kamko matnange agananiara ‘politics’ kal·ani gitasa ong·enga ine Sawkmie parakatskaenba, iandakgipa scheme-rangni bidingo ‘politics’ kal·jachina BJP dolko didiataha.
“Ma·mong sorkarini ra·gatgipa scheme-rangko nama kam ka·jaenga ine ian a·dok sorkariko matnangenba politics kal·e roani somoi ong·ja. Ma·mongo sorkariko chalaiengani gimin iandake BJP dol, politics kal·na chol ra·na nangja,” ine Sawkmie aganaha.
Barla-ni agangipa kattarangko poraisoe namen aiao inmanbeaha ine janapatengon, a·doko chi banenggipa obostako a·dok sorkarini jako ra·e kam ka·anikode ua mittelpilna kraa ine Congress doloniko ra·gala man·gipa MLA parakataha.
Meghalaya a·doko mikkarang waanganichi bang·en noksan ong·atako man·na nangahani gimin ua ma·mong sorkarini gita dakchakaniko parakatani giminsa Barla-oniko ka·dongsoengachim ineba Sawkmie aganaha.
Meghalaya a·doko mikkarang waanganichi gong kror 300-mangni gita noksan ong·na nangahani gimin a·dok sorkari, tangka paisarangko dakchake on·china gita ma·mong sorkariko didiatahachim ine nikna man·a.
Comments are closed.