Phulbari NGO-rang, bol cha·ue salgiparangko rim·a  

Tura: Machangpani songni sepangjolgipa biapo Sonibar atamo niamgri bol cha·ue salgiparangko Phulbari-ni NGO memborrang rim·aha. Indake rim·a man·giparangko police-na pakwatangaha. Cha·ue bol salgiparangni kosako forest department kam ka·angskagen.
GSU, GSMC aro AYMBS NGO dolrang, niamgri bol cha·ue salani koborko man·e sandina ong·katon, bolgni gari re·ako nikna man·aha. Indake ua gariko dondipate am·sandianiko dakon koratchi den·daldalgipa bolrangko nikaha.
ML 08G 0524 aro ML 08C 1223 – ia nomborni bolgni gario niamgri bolko salna jakkalaha. WGH Phulbari jolni police-na koborko on·ataon uamang jolan sokange bol salgipa gariko ra·sekaha aro NGO-rang, police-na mamlako segataha.
“Chinga gariko police-na pakwataha aro state forest department-naba u·iataha. Indake niamgri bol salgiparangni kosako rakgipa ja·kuko de·china mol·molaha. Iandakgipa obostarangko nikna man·ronga, uni gimin bol cha·ue salgiparangni kosako rakgipa ja·kuko de·jaskalde iandakgipa obostarangko champengna man·jawa, ine GSU-ni vice president Peter A Sangma aganaha.
Buring-bolgrim jolrangoniko niamgri bol cha·ue ratani obostarangko name dake nirokna man·jaengani gimin NGO-rang suk ong·gijako parakaha. GHADC aro a·dok sorkarini forest department, gimik ramarangkon name dake nirokenga ong·ode maidake niamgri bol cha·ue salako nikna man·skaenga ine sing·ataha.
“Garo Hills-o batanggimin antirango mikka jime waanichi a·a rurongdapa chibana a·selrangko nikna man·aha aro sak 14 manderang sitokaha. An·chingoba climate change-ko talen nikna man·engjok. Indake somoio mikbokrakgiparang buringko bon·atna jotton ka·kuenga aro iako dal·en ra·jaenga. Indake ong·angkua ong·ode Garo Hills ta·raken bangbanggipa ong·skagnok, ine AYMBS-ni president Nikseng Sangma aganaha.
Uandake GSMC-ni Jack A Sangma-ba Garo Hills-o nirokgipa dolrangni simsakgijani a·sel iandakgipa obostarangko bang·en nikna man·enga ine agandapaha.

Get real time updates directly on your device, subscribe now.

Comments are closed.