SHILLONG: Adita salrangna skang, Shillong songjinmao kam ka·enggipa Kerala a·dokni chadambe sakgniko, ma·sina man·gijagipa manderangni kragija dake chadrapahani gimin chadrapgipa manderangni kosako dingtang dingtang dolrang raken jegalattokaha.
Ia a·selko All India Trinamool Congress (AITC) jegalatengon, niam retirangko name rakkijaengani a·selsa a·doko iandakgipa a·selrangko nikna man·enga ine a·dok sorkariko matnangataha.
Police department-o kam ka·giparang chu·ongjaengani a·sel iandakgipa obostarangko name nirokna man·jaenga ineba AITC parakataha.
“Saljrakjrakon Shillong songjinmao iandake gipin biapni manderangko chadrapaniara a·doko ong·gija dakgipa kamrangni batroroaniko mesokani ong·enga. Ian manderangni niamna kengijaniko mesokaniba ong·enga,” ine AITC-ni Chief Whip George B Lyngdoh parakataha.
Koborko on·ani gitade, re·anggipa Sukrobar salo, Kerala a·dokni chadambe sakgniko, motorcycle-o re·bagipa adita sak manderang, kragija dake chadrapangahachim.
Meghalaya police-o kam ka·giparang chu·ongjae Shillong songjinmao name nirokna man·jaengani gimin ong·gija dakgipa manderang, iandakgipa kamrangko ka·na chol ra·enga ineba AITC-ni dilgipa parakataha.
Ia a·selni bidingo Meghalaya-ni All India Malayalee Association-ba dingtangmancha tom·aniko ong·ate jegalgrimaniko parakataha aro dos dakgipa manderangko ta·raken rim·china a·dokni Home Minister aro DGP-ko didiataha.
Apsan daken, Thma U Rangli Juki (TUR) dolba ia a·sel ong·ani gimin suk ong·gijaniko parakataha aro ia a·selko jegalenggipa pilak dolrangkoba mittelpilataha.
Gipin biaprangoni re·bagipa manderangko iandake chadrapengani a·sel manderang Meghalaya a·doko naljokani gri ong·niktokenga ineba TUR parakataha.
Ia a·selni bidingo ta·raken am·sandianirangko dakenba, Meghalaya a·dokna biming namgijako ra·bagipa manderangni kosako rakbatgipa ja·kurangko de·china gitaba TUR didiataha.