SHILLONG: Gipin dolrangni MDC-rangko man·chape, dingtang dingtang dolna kamko ka·enggipa bang·a manderangan United Democratic Party (UDP)-o naptokahani gimin aro gipin dolrangni adita sak MLA-rangba re·baenggipa 2023 bilsini Assembly election-o UDP-ni tikito susana manchitokengani gimin re·baenggipa bilsiode gital sorkariko UDP dilna ka·dongsoenga.
UDP-ni president Metbah Lyngdoh-ni parakatani gitade, batanggimin somoirangoba uamang joltangni dolrangko apsan ong·ate kamrangko ka·rimna jotton ka·ahachim indiba uamangni miksonganirang chu·sokgipa ong·jaha.
Indake ong·genchimoba ia changode political dolrang ong·ja indiba dingtang dingtang political dolni dilgiparangsa kamko ka·enga ine Lyngdoh aganaha.
Khasi aro Jaintia Hills a·jarangode UDP-na balwarang namen nambatenga aro Garo Hills-oba adita seat-rangkode chena ka·dongenga ineba UDP-ni president parakataha.