SHILLONG: Assam aro Meghalaya a·dokni simarango meligrikna man·jaenggipa biaprangoni Tarabari jolni bang·bata manderangan Assam a·dokni election-rangosa bakko ra·genchimoba da·o Tarabari jolni 4.69 sq km-kode Meghalaya a·dokona man·baengaha ine Bristibar salo Rambrai-Jyrngam-ni gitcham MDC aro National People’s Youth Forum (NPYF)-ni dilgipa Bajop Pyngrope parakataha.
Bajop-ni parakatani gitade, Tarabari jolo songdongenggipa manderang, skangonin Meghalaya a·dokni election-rango bakko ra·jani gimin Meghalaya a·dokni bak ong·jachim indiba ia jolrango songdongenggipa manderang baksa agangrikon, 80 percent-ni gitade Meghalaya a·dok ning·o ong·na nangniktokengani gimin a·dok damgni soi ka·grikgipa MoU-o Tarabari-ni 4.69 sq km-kode Meghalaya a·doko napatna tik ka·angaha.
“Tarabari jolonaba regional committee-ni membor-rang re·ange agangrikeon, ia jolrango songdongenggipa A·chikrangoni 80 percent-de Meghalaya a·dok ning·o ong·na nangniktokaha indiba 20 percent-ni gitasan Assam-o ong·na nangnikaha,” ine Bajop parakatenba, ia gimkko name nichengani ja·manosa a·dok damgnini soi ka·grikgipa MoU-o Tarabari jolni 4.69 sq km-kode Meghalaya a·dok ning·o napatna tik ka·aha ine talataniko on·angaha.
Tarabari jolo songdongenggipa 20 percent manderangni songgimikkon Assam-o dongrikchina nangnikaniara Assam ba Meghalaya sorkarini a·sel ong·ja indiba songo donggipa manderangni gisepo dingtanggrike chanchiani a·selsa ong·enga ineba NPYF-ni dilgipa parakataha.
“Tarabari jolo songdongenggipa manderangoni 80 percent-de Meghalaya a·dok ning·o ong·na skaniko parakmanaha. Ia neng·nikaniko dolgni sorkarirangan namatna jotton ka·enga indiba biapona re·anggenchimode ian altua kam ong·jaenga,” ine Bajop talataniko on·angaha.
Ia kamko gitcham sorkarini salgipa wa·rengosa pangchake da·o dolgni sorkarirang soi ka·grikahachim indiba ia MoU-o opposition dolni ra·galpilna jotton ka·aniara a·dok damgnini gisepo so·sojengjeng ong·aniko namatna sikgijaniko mesokanian ong·enga ineba NPYF parakataha.