SHILLONG: Inner Line Permit (ILP)-ko ra·gate on·china gita Meghalaya a·doko songdongenggipa manderang dabitokengon, manderangni nangnikanirangko kal·ake roaniara kraani ong·ja ine Khasi Students Union (KSU) parakatenba, ILP-na dabiani bidingo gisik nangbate mesokchina a·dok sorkariko aro a·dok gimikni sak 60 MLA-rangko didiataha.
Meghalaya a·doko ILP-ko ra·gatchina dabidilenggipa KSU dolni parakatani gitade, a·dok sorkari an·tangan ia dabiani bidingo gisiko nange mesokjaengachim.
“ILP-ni bidingo ma·mong sorkari baksa agangrikani kamde a·dok sorkarini daitoan ong·achim indiba ia kamko jako ra·anio a·dok sorkari gisik nangbrejaenga gita nikenga. Batanggimin changrangoba uamang, ian ma·mong sorkarini jakosa ong·a ine aganaha. Resolution-ko pass ka·mangmangchin sorkari chu·ongnikaienga,” ine KSU-ni president Lambokstar Marngar parakataha.
ILP-na dabienggipani bidingo a·dok sorkari aro sak 60 MLA-rang, a·doko songdongenggipa manderangna aganchakaniko on·na nanggiparang ong·a ine janapatengon, a·doko ILP-ko ra·gate on·kujaskal, a·dok gimikni sak 60 MLA-rangan, gisiko nange dabidilna gita nanga ine Marngar parakataha.
ILP-na dabienggipani bidingo KSU, songni nokni dilgiparangna agan-talate on·anirangko dakenga aro mikkangchiba dakangkugen ineba Marngar parakataha.
Songni nokni dilgiparangna agan-talate on·anirang matchotahaon, iani bidingo KSU, gnigipa ja·kuko de·e kam ka·angskagen ineba ua parakataha.
Meghalaya a·dokna ILP-ko dabina gita 2019 bilsion Meghalaya Legislative Assembly-oba dingtangmancha resolution-ko ra·manahachim ine nikna man·a. Uni ja·man Union Home Minister Amit Shah-ba baditaba chang a·dokona re·baanio a·dok sorkari baksa agangrikahaoba da·onan ILP-ni bidingo maming aganchakanirangko on·skakujaengachim.