TURA: Ia sal somoirango West Garo Hills a·jani police-rang, cha·ue palenggipa gari aro bike-rangko rim·na bilakbate kamrangko ka·engon, dingtang dingtang somoi aro biaprango cha·ugimin bike bolgniko man·pilaha ine kobor on·aha.
Police-rangni u·iatani gitade, ia bilsini March 17 tariko Fokoruddin Sk minggipa mandeni Splendor Bike-ko ma·sina man·gijagipa manderang cha·uangahachim aro iani bidingo Sukchar police station-o mokordoma ka·ani ja·man police-rang, ia bike-ko sandienba, Robibar pringo man·pilaha.
Apsan daken, 2019 bilsini May 25 tariko saksa Nagor Sikdar minggipa mandeni Bajaj Pulsar 150 CC Bike-oba ma·sina man·gijagipa manderang cha·uangahachim aro iani bidingo Barpeta police station-o mokordoma ka·ani ja·man police-rang, ia bike-ko sandie apsan salon man·pilaha.
Ia bike bolgnikon Dadenggre police station-o donenga aro iani bidingo bike nokgiparangna u·iatmanaha ineba West Garo Hills a·jani police-rang u·iataha.
Batanggimin somoirangoba, West Garo Hills a·jani police-rang, iandake cha·ue palenggipa gari aro bike-rangko am·sandie, bang·a gari aro bike-rangkon man·pile on·ahachim ine nikna man·a.